Un ataque deixa fóra de servizo os servidores do rexistrador de dominios de Internet Go Daddy

Nas últimas horas numerosas páxinas web de todo o mundo pasaron a estar fóra de servizo, non por problemas nos seus sistemas, senón por depender dos servidores de nomes de Internet de Go Daddy, servizo que estaría a recibir un ataque de denegación de servizo reivindicado por un individuo dado a coñecer como Anonymous Own3r (non estariamos ante unha acción do colectivo coñecido como Anonymous).
Dende Go Daddy recoñeceron o fallo e informaron sobre o mesmo a través de canles alternativas (como Facebook ou Twitter) durante o tempo no que a súa propia páxina web quedou fóra de servizo (actualmente amosa unha mensaxe na que aseguran estar a traballar na recuperación dos seus servizos), e parece que pouco a pouco as páxinas web que dependen deles comezan a estar accesibles en certos territorios.
As páxinas web que quedaron fóra de servizo son as que dependían do servidores de nomes cns1.secureserver.net, cns2. Secureserver.net e cns3.secureserver.net, o que reabre o debate sobre a seguridade nos servizo na Rede, e a necesidade de adoptar máis medida que impidan incidencias que afecten a milleiros de páxinas web á vez.
ACTUALIZACIÓN (11-9-2012): Dende Go Daddy asumen a culpa do fallo dos servidores de DNS e negan que fose consecuencia dun ataque.