Huawei amosa o seu novo smartphone de alta gama cun grosor de só 6,18 milímetros

Os fabricantes chineses queren xogar un maior papel no sector da telefonía móbil, e xa non se limitan a ofrecer terminais económicos de baixa gama, senón que tamén apuntan á alta gama, poñéndollo cada vez máis difícil a outros fabricantes consolidados como Samsung, HTC, LG ou Sony, como vén de demostrar Huawei co novo smartphone que presentou hoxe en Londres, o Huawei Ascend P6, que con só 6,18 milímetros de grosor presume de ser o smartphone con Android máis delgado do mundo, característica coa que non se conforma, polo que vén equipado tamén cun procesador de catro núcleos a 1,5 GHz, carcasa de aluminio, pantalla de alta definición de 4,7 polgadas (con Magic Touch que permite que poidamos empregala coas luvas postas), batería de 2.000 mAh e sistema operativo Android 4.2.2.
Este novo móbil de só 120 gramos de peso quere ser o buque insignia da familia Ascend P, chegando cunha cámara traseira de 8 Mpíxeles con gravación de vídeo Full HD e cámara frontal de 5 Mpíxeles (ideal para autofotografías e videoconferencias). Porase á venda en China este mesmo mes, mentres que en Europa deberemos agardar ao mes que vén para velo á venda a través de compañías como Vodafone, Telefónica, Amazon, Media Markt e The Phone House.

Vídeo de presentación do novo Huawei Ascend P6