Samsung continúa a liderar as vendas globais de smartphones

A consultora IDC vén de publicar os datos relativos ao mercado de teléfonos móbiles durante o segundo trimestre de 2013, no que os fabricantes terían posto en circulación 432,1 millóns de terminais, mellorando os 407,7 millóns do mesmo período do ano anterior e incluso superando os 428,8 millóns de unidades do primeiro trimestre do ano, aínda que podendo destacarse o feito de que só un puñado de fabricantes acumulan a meirande parte das vendas (os 5 maiores fabricantes acapararían o 55,2% dos dispositivos).
Se nos centramos no mundo smartphone temos que o seu volume durante o segundo trimestre tamén foi moi importante (237,9 millóns de unidades) superando considerablemente os datos do ano anterior (156,2 millóns) e confirmando así a tendencia na que os móbiles con conexión á Internet están a ter unha demanda cada vez maior, deixando cada vez máis marxinados aos móbiles básicos (que manteñen o seu volume en grande medida polos mercados emerxentes).

Samsung non só sería o fabricante con máis smartphones vendidos (72,4 millóns), senón que tería unhas vendas superiores aos seus 4 máis directos competidores, que serían Apple (31,3 millóns), LG (12,1 millóns), Lenovo (11,3 millóns) e ZTE (10,1 millóns). O fabricante surcoreano experimentaría así un crecemento interanual do 43,9%, mentres que Apple tería que conformarse cun 20%, polo que as prácticas comerciais de Samsung parecen ser todo un acerto, aínda que é de agardar que este crecemento desorbitado non poida manterse moitos máis trimestres, por achegarse moito ao tope que pode absorber o mercado, aínda que Apple chegaría antes a tal estancamento, sendo a compañía do Top 5 co menor crecemento interanual, mentres que varios fabricantes emerxentes conseguiron dobrar o seu volume de vendas no último ano.
Se en vez de mirar só aos smartphones, atendemos aos móbiles en xeral, temos que Apple pasaría a un digno terceiro posto, precedido por Nokia, que con 61,1 millóns de móbiles vendidos consegue manter o seu peso no mercado, aínda que caendo un 27% con respecto ao segundo trimestre de 2012. Samsung mantén a súa fortaleza con 113,4 millóns de móbiles vendidos, medrando un 16,3% interanual.