Apple actualiza os iMac cos novos procesadores de Intel

Os ordenadores de sobremesa de Apple, os iMac, recibiron hoxe unha actualización importante, de xeito que a partir de agora venderanse con procesador Intel de catro núcleos de cuarta xeración (Haswell), novas gráficas, Wi-Fi de nova xeración e opcións de almacenamento flash de maior velocidade (ata un 50% máis rápidas que as da anterior xeración), mantendo a súa aparencia externa tan delgada e elegante.
O iMac de entrada sería o modelo con pantalla IPS de 21,5 polgadas (Full HD), procesador Intel Core i5 de catro núcleos a 2,7 GHz, gráfica Iris Pro, 8 Gb de RAM (acepta ata 16 Gb), 1 Tb de disco duro (con opción para Fusion Drive ou SSD de 256/512 Gb), Wi-Fi AC e Bluetooth 4.0 por un prezo de 1.329 euros.
Na configuración básica máis elevada teríamos unha pantalla IPS de 27 polgadas (cunha resolución de 2.560 x 1.440 píxeles), procesador Intel Core i5 de catro núcleos a 3,4 GHz (con opción para Intel Core i7 de catro núcleos a 3,5 GHz), 8 Gb de RAM (con opcións de 16/32 Gb), 1 Tb de disco duro (con opcións de ata Fusion Drive de 3 Tb ou SSD de 256 Gb/512 Gb/1 Tb), gráfica nVIDIA GeForce GTX 775M con 2 Gb de memoria (con opción de nVIDIA GeForce GTX 780M con 4 Gb de memoria) por un prezo de 2.029 euros (a súa configuración máxima elevaría o prezo ata os 3.979,01 euros).