Vodafone España estrea novos prezos máis flexibles para as empresas

A operadora Vodafone España vén de renovar a súa oferta de plans de prezos. A reestruturación, sinala a compañía, levouse a cabo baixo unha arela de adaptarse ás necesidades de cada empresa. Os novos plans de prezos (Rede Empresa) foron impulsados tamén cunha finalidade de seren flexibles, o que quere dicir que se ampliou a marxe para adaptar e compartir os datos e chamadas internacionais entre todas as liñas. A intención, engade a empresa, é “optimizar o consumo de datos e minutos precisos para as comunicacións das PEME segundo perfís de uso”.
Os plans Rede Empresa pódense contratar dende esta semana. Para comezar, hai dúas modalidades de bonos compartidos de datos: Rede Empresa Bono Compartido e Rede Empresa Bono Compartido Lite.
O primeiro bono inclúe, por 70 euros ao mes, 12 GB de datos ao mes compartidos entre as liñas da empresa, chamadas ilimitadas entre os móbiles da compañía, 500 minutos en chamadas internacionais a Europa compartidos por todas as liñas e 1.000 SMS por cada liña ao mes. Esta proposta pódese contratar por 50 euros ao mes asociada aos servizos de banda larga fixa como ADSL/Fibra2.
O segundo bono inclúe o seguinte por 35 euros ao mes: 4GB de datos ao mes compartidos entre as liñas da empresa, chamadas ilimitadas entre os móbiles da mesma, 150 minutos en chamadas internacionais a Europa compartidos por todas as liñas da compañía e 1.000 SMS por cada liña ao mes. Esta proposta pódese contratar por 25 euros ao mes asociada aos servizos de banda larga fixa como ADSL/Fibra2.
Por certo que a devandita proposta complétase con 4 plans de prezos (3 voz e 1 de datos) posibles para cada liña de empregado: Rede Empresa Tarifa Plana 24h, Rede Empresa Tarifa Plana 12h, Rede Empresa Tarifa 5 e Rede Empresa Tableta.
O primeiro plan (20 euros ao mes) achega10.000 minutos ao mes por liña (sen custo de establecemento) en chamadas a móbiles e fixos nacionais a calquera hora do día. Consumidos os 10.000 minutos o prezo por minuto é de 0,18 euros o minuto e de 0,15 o establecemento de chamada.
Pola súa parte, o segundo plan (Rede Empresa Tarifa Plana 12h) inclúe por 15 euros ao mes 10.000 minutos ao mes por liña (sen custo de establecemento) en chamadas a móbiles e fixos nacionais de 8:00 a 20:00h de luns a venres. Fóra do horario ou superado o límite, o prezo por minuto é de 0,18 euros o minuto e de 0,15 de establecemento de chamada.
Rede Empresa Tarifa 5 (5 euros/mes) inclúe chamadas a móbiles e fixos nacionais por 0,05 euros/min. e 0,15 de establecemento de chamada.
Rede Empresa Tableta (5 euros ao mes) permite navegar desde unha tableta, módem ou Mi-Fi usando os datos incluídos en calquera bono compartido Rede Empresa.