Twitter cancela inxustificadamente unha conta satírica

Nuns días nos que hai moita sensibilidade ao respecto da liberdade de expresión, concretamente co uso do humor, sorprende ver como dende Twitter non lles treme o pulso á hora de suspender temporalmente a conta dun usuario por “publicar información ou imaxes privadas dun individuo”, cando o único que fixo realmente foi ironizar sobre un comentario doutro usuario de Twitter incluíndo a súa fotografía de perfil (información claramente pública).
A conta de usuario suspendida, @Barbijaputa, era claramente recoñecida como unha conta satírica con máis de 157.000 seareiros, polo que resulta difícil de entender como dende a plataforma social toman medidas drásticas sen comprobar realmente se a reclamación presentada está fundamentada.
A polémica xurdiu a partires dun chío de Isaac Jiménez, no que excedendo certas barreiras de respecto e bo gusto asegurou que “o 60% dos infectados pola hepatite C é por consumir drogas vía intravenosa e o 15% por ir de put*s. E temos que pagar”, o que levou a @Barbijaputa a responder cun comentario no que retorcía o texto orixinal para volvelo na contra do seu autor: “Ides de put*as e picades a vea e quen ten que pag*ar? El -> @isaacj”, engadindo a fotografía de perfil do mencionado, ou sexa, unha reacción que non infrinxe en absoluto as políticas de Twitter, e que entra claramente dentro da liberdade de expresión, de xeito que incluso entidades como FACUA están a manifestarse en contra do xeito de actuar de Twitter, destacando que con estas prácticas Twitter vulnera o texto refundido da Lei Xeral para a Defensa dos Consumidores e Usuarios, o Código Civil e a Constitución Española, polo que procederon a remitir as respectivas denuncias ante as autoridades estatais pertinentes.