Google quere potenciar o uso de Android na empresa

Dende Google destacan que actualmente hai máis de mil millóns de persoas cun dispositivo con Android, que curiosamente son máis potentes que os ordenadores de non hai moitos anos, o que permite que se convertan en auténticas ferramentas de traballo mentres nos permite consultar o e-mail, editar documentos, revisar informes… e en vista de que dispositivos como smartphones e tabletas con Android están infrautilizados no lugar de traballo lanza gora o programa Android for Work, co que buscan que os negocios intensifiquen o seu uso de Android.
Este programa está baseado en catro tecnoloxías chave: perfís de traballo (con Android 5.0 pode separarse a información persoal da de traballo), a aplicación de Android for Work (que busca achegar funcións propias dos perfís de traballo a dispositivos con Android 4.x), Google Play for Work (tenda de aplicacións que facilita a administración de aplicacións entre os dispositivos dos traballadores da empresa) e ferramentas de produtividade integradas (aplicacións para a xestión do correo electrónico, os contactos e o calendario, así como aplicacións para editar documentos ofimáticos).
Deste xeito Android busca un maior achegamento á empresa, cun sistema seguro, que sexa doado de administrar para os responsables tecnolóxicos das compañías, que se integre con solucións de xestión de flotas actuais e que, en definitiva, anime para tirar proveito dos dispositivos móbiles no traballo.