Dúas ducias de emprendedores traballarán a pleno rendemento no Centro Yuzz de Santiago

Finalmente Compostela xa conta de xeito oficial e a pleno rendemento con Centro Yuzz, ou o que é o mesmo, un foco de emprendemento e innovación para a nosa mocidade auspiciado pola RedEmprendia, a Universidade de Santiago e o Centro Internacional Santander Emprendemento (CISE), o Banco Santander e a Xunta de Galicia. O novo centro para a creación de negocios baseados no coñecemento e na creatividade está emprazado no Edificio Emprendia, onde 23 mozos e mozas seleccionados xa polo programa traballarán os vindeiros meses para facer realidade as súas ideas emprendedoras.
O reitor da USC, Juan Viaño, presidiu a inauguración do Centro Yuzz Santiago acompañado pola conselleira de Traballo e Benestar da Xunta de Galicia, Beatriz Mato. Viaño destacou que a presenza de Yuzz na Universidade de Santiago “brindará ao nosos mozos unha oportunidade única para formarse, emprender, intercambiar experiencias e establecer unha excelente rede de contactos en todo o país”. Na súa opinión, o programa “vén fortalecer a estratexia de fomento do emprendemento da universidade, completando o ecosistema emprendedor e reforzando o importante labor que desempeñan o Concurso de Ideas Empresariais Innovadoras da USC e o programa Argos.”
A conselleira de Traballo dixo, pola súa banda, que este ano o programa Yuzz conta cun “importante reforzo” grazas á participación da USC. Mato tamén salientou os “éxitos” logrados polos participantes galegos do programa, que acadaron o segundo premio no 2013 e o primeiro premio de toda España o ano pasado. Para o presidente de RedEmprendia, Senén Barro, dispor dun Centro Yuzz na USC é un “enorme motivo de satisfacción” e tamén un acerto que o programa aposte cada vez máis “por integrarse no mundo universitario, de onde proceden a maior parte dos emprendedores participantes no programa”. Desde o Banco Santander, Pablo Berdiel amosou o medre que tivo o programa de emprendemento nesta convocatoria, “duplicando o número de centros en toda España para promover o talento da xuventude e impulsar o espírito emprendedor”.
Segundo informa a USC, dende o Centro Yuzz Santiago recibirán apoio, formación e asesoramento de expertos 23 dos 900 mozos e mozas emprendedores seleccionados na convocatoria 2015 do programa. Os participantes, seleccionados entre máis de 2.000 inscritos de toda España, foron elixidos, lembra a USC, “por aspectos como o seu perfil emprendedor, traxectoria, capacidade para comunicar a súa idea, o compoñente innovador do seu proxecto, a súa creatividade e o potencial de crecemento da súa idea, entre outros”. E salienta, acerca do potencial e a orixe multidisciplinar das mozas e mozos que operarán dende o acubillo innovador compostelán: “O grupo santiagués destaca pola variedade temática das súas ideas de negocio, que apostan por innovar en ámbitos como as redes sociais, a gastronomía, a saúde, a educación, a comunicación e as TIC. De feito, entre os mozos e mozas participantes no Yuzz Santiago hai estudantes de belas artes, xornalismo, humanidades, administración e dirección de empresas, informática, física, enxeñería ou ciencias da saúde.
Por certo que unha vez rematado o proceso de formación, o mellor proxecto do Centro Yuzz Santiago viaxará a Silicon Valley, nos Estados Unidos, onde terá acceso a foros de financiamento, asesoramento e contacto con investidores. Ademais, ao seu regreso poderá optar a un dos premios que Yuzz vai repartir entre os tres mellores proxectos do país: 30.000 € para o primeiro premio, 20.000 € para o segundo e 10.000 € para o terceiro.