Kiply expón no Centro Demostrador TIC o seu revolucionario software de produtividade profesional

O Centro Demostrador TIC vai dar acollida este mércores 8 de abril a unha xornada sobre como sermos máis eficaces no plano empresarial e no noso día como profesionais. O seminario, que se desenvolve en horario de 11.00 a 12.00 horas, celébrase baixo o seguinte epígrafe: Descobre como medir e analizar o teu rendemento para aumentar a túa produtividade profesional e persoal. Segundo nos contan dende o Centro Demostrador TIC (emprazado como lembraremos no CNTG de Santiago), os asistentes poderán coñecer o funcionamento, os servizos e os beneficios da ferramenta Kiply desenvolvida pola empresa galega do mesmo nome.
Como temos sinalado dende Código Cero acerca de Kiply, trátase dun software multidispositivo que de xeito automático mide e analiza a actividade persoal en tempo real e de forma privada. Unha vez que o teñamos no PC, tableta ou teléfono intelixente, informan os responsables deste desenvolvemento, poderemos recompilar información sobre a nosa actividade de xeito automático e sen que sexa preciso ningún tipo de intervención adicional. A partir da instalación, cada semana recibiremos un correo electrónico cun informe sobre a nosa actividade para que poidamos saber como e de que maneira investimos o noso tempo.
Polo tanto, a ferramenta Kiply foi creada ante todo para incrementar a produtividade persoal dos usuarios de dispositivos, e para acadalo integra tecnoloxía, metodoloxía e un terceiro factor que sempre é de agradecer: consellos para unha vida mellor. Neste caso concreto, unha vida máis produtiva.
A actividade do Centro Demostrador TIC está orientada sobre todo para traballadores independentes da información ou autónomos e PEME. A encargada de facer a demostración será a propia empresa do mesmo nome, start-up galega adicada á creación de software de produtividade persoal para profesionais e empresas.
Para participar nesta actividade cómpre inscribirse na web do CDTIC. As persoas que non poidan acudir á demostración poderán seguila a través de streaming.