Twitter achegará unha selección cos mellores contidos para cada usuario

Para axudar aos usuarios de Twitter que non están as 24 horas pendentes do que se publica está a comezar a espallarse unha nova prestación coñecida como Highlights que recollerá o máis interesante de cada día e entregarao ao usuario mediante notificacións push. Podemos entender esta funcionalidade como un sinxelo sumario de Twitter que escolma os contidos que o sistema considera que son os máis relevantes para o usuario en función da xente á que segue e coa que ten máis relación, ou sexa, que podería considerase como unha versión personalizada dos Trending Topics.
Dado que estes Highlights son intrusivos (chegan a través dunha notificación) o usuario deberán activar esta función expresamente, e cando se reciba a notificación correspondente poderase interactuar coa mesma para acceder aos contidos recollidos dende a aplicación de Twitter, podendo desprazarse o usuarios entre os distintos chíos destacados cun xesto de desprazamento lateral de xeito que ao pasar o último contido recollido volverase á cronoloxía ordinaria de Twitter.
Polo momento esta funcionalidade só está dispoñible para dispositivos móbiles con Android que estean configurados en inglés, e paulatinamente irase espallando a máis plataformas e linguas.