Galicia, á cabeza do proxecto Stamar para unha mellora tecnolóxica das PEME pesqueiras

As PEME do sector marítimo coñecerán de primeira man ás innovacións tecnolóxicas máis sobranceiras ao longo dunha xornada que se celebra este mércores 6 de maio de 10 a 15:30 horas no Centro Demostrador TIC (CDTIC) de Galicia. Estamos a falar da primeira das demostracións tecnolóxicas que se desenvolverán no marco do proxecto europeo Stamar, liderado pola Xunta, a través da Axencia de Modernización Tecnolóxica de Galicia (AMTEGA), coa participación como socio da Axencia Galega de Innovación (GAIN) e de 7 entidades de referencia no eido da transferencia tecnolóxica, a innovación e a economía marítima de Francia, Reino Unido, Irlanda e Portugal.
Neste primeiro encontro presentarase o catálogo BAT (Best Avaliable Technologies), unha preselección rexional das mellores tecnoloxías, que será posta a disposición das empresas do sector e demais axentes implicados.
E en que consiste o proxecto Stamar? Pois ten como obxectivo contribuír a mellorar a competitividade e a capacidade de innovación das PEME do sector marítimo do Espazo Atlántico, favorecendo os procesos de transferencia tecnolóxica a través da creación dun centro transnacional demostrador das capacidades e tecnoloxías aplicables á industria marítima. Empréstase especial atención a aquelas tecnoloxías que van a prol o desenvolvemento económico e comercial preservando a biodiversidade e facendo máis doado un desenvolvemento sostible co medio ambiente.
E que papel xoga neste proxecto o Centro Demostrador TIC de Galicia (CDTIC)? Este será o modelo de referencia a seguir polo resto das rexións participantes a xeito de escaparate tecnolóxico e referencia no pulo e emprego das TIC nos sectores produtivos mediante a asesoría, a capacitación e a formación tecnolóxica.
Cómpre informar que os interesados en asistir a este evento poden inscribirse no 981 555 291 ou a través do correo electrónico stamar-xornadas@xunta.es pois o aforo será limitado.