Até 50 candidaturas aspiran este ano aos Premios InLugo

A Deputación de Lugo vén de informar do peche do prazo para a presentación de candidaturas aos Premios InLugo, que se van entregar por terceira vez no marco do congreso do mesmo nome (o 9 de maio) e que nesta convocatoria saldouse con máis de 50 aspirantes inscritos. Os galardóns, que servirán de broche de ouro ao Congreso #InLugo, teñen o obxectivo de “recoñecer aquelas iniciativas, persoas ou organizacións da provincia luguesa que destaquen polo bo uso de Internet e novas tecnoloxías en diferentes ámbitos”. Convoca a Deputación Provincial, que lembra que este ano achegáronse catro categorías: Comercio, Lecer e Restauración; Educación e Formación, Cultura e Social e Tecnoloxía.
“A cantidade de propostas recibidas demostra, un ano máis, o interese que suscitan estes premios entres os distintos sectores da provincia luguesa”, engade o organismo lucense, que respecto á fórmula empregada para valorar os aspirantes explica que se lle encargará este cometido a un xurado formado por membros da Deputación, elixíndose un premiado por cada modalidade.
Como dixemos, a cerimonia de entrega de premios terá lugar o próximo sábado 9 de maio de 2015 desde as 20:00, no marco do III Congreso de Cultura Dixital e Redes Sociais #INLUGO. O gañador de cada categoría recibirá, ademais do recoñecemento do público e do xurado, unha figuriña e un iPhone 6 de 128 GB de capacidade.