Galicia ponse en segundo lugar en crecemento de factura electrónica

Galicia vén de situarse en segundo lugar na clasificación de comunidades que atinxe ao nivel de uso da e-factura, só por detrás de Asturias. Estes e outros datos figuran no Estudo de Implantación da Factura Electrónica en España realizado polo grupo Seres, empresa que incide no importante avance levado a cabo en 2014 no emprego deste servizo dixital a nivel español (a media de todas as comunidades): pasouse dunha taxa de medre do 5,2% en 2013 ao 13,6%. Asemade, a investigación sinala que durante o primeiro semestre de 2014 as empresas estatais intercambiaron un total de 67.134.211 facturas electrónicas como dixemos, un 13,6% máis que no mesmo período do ano anterior).
No informe dise que a aposta por esta metodoloxía electrónica posibilitou un aforro de preto de 332 millóns de euros en recepción de facturas e 188 millóns na súa emisión. Como dixemos, as comunidades onde máis medra o número de emisores son Asturias (1,02%), Galicia (0,88%) Madrid (0,48%). Pola contra, en Murcia descende un 0,45%. Polo que atinxe ao número de empresas receptoras hai “poucas variacións”, exceptuando a suba en Madrid dun 0,82% e o descenso en Andalucía dun 0,79%.
En canto ás áreas de actividade, o sector servizos aumentou a súa participación un 20,08% na emisión e un 23,36% na recepción. No estudo dise que a suba débese, en boa medida, á entreda en vigor da Lei 25/2013, que obriga ao emprego desta metodoloxía dixital a partir do 15 de xaneiro de 2015 nos trámites coas administracións.