A Coruña acollerá en xuño a edición galega da Olimpíada Mundial de Robótica

Para quen queira gozar vendo os últimos desenvolvementos dos nosos futuros expertos en intelixencia artificial, dicirlle que hai se achega unha relevante cita sobre a materia que nos colle aos galegos ben de preto. Falamos da Olimpíada Mundial de Robótica, a edición galega da World Robot Olympiad (WRO), que se celebra na Coruña o vindeiro 20 de xuño e que vén da man da Colexio Profesional de Enxeñaría en Informática de Galicia (CPEIG), o Colexio Compañía de María da Coruña e as súas asociacións AMPA e ARKITAS Robótica. A competición está dirixida a rapazas e rapaces de entre 7 e 19 anos. Haberá tres categorías diferentes. A través delas, os participantes terán que montar e programar os robots en directo e competir por equipos en tres retos diferentes.
Os equipos que superen a fase local irán á cita estatal en Barcelona o vindeiro 11 de outubro. A final internacional este ano celebrarase en Doha, Catar, os días 6 e 8 de novembro.
Trátase da primeira vez en que A Coruña acolle esta competición de robótica, sendo o emprazamento elixido o pavillón de deportes do Colexio Compañía de María (avenida Calvo Sotelo 2-4). Como dixemos, a cita galega conta co apoio do CPEIG e o patrocinio de organizacións, entidades e colectivos como por exemplo Cetronics A Coruña, a Obra Social La Caixa, a Fundación EducaBot e ARKITAS, socio local da WRO. Este evento internacional conta cunha década de traxectoria. Celebrou a súa primeira a súa primeira competición de robótica no ano 2004 e nela participaron 12 países e 4.000 equipos. En 2013, foron máis de 42 países e en torno a 20.000 equipos de todo o mundo os que competiron nas actividades de competicións locais, rexionais e nacionais. Ao longo do 2015, celebraranse torneos nas cidades da Coruña, Barcelona, Burgos, Xirona, Xaén, A Rioxa, As Palmas, Lleida, Madrid, Málaga, Murcia, Donostia, Tenerife, Valencia e Vic. Como se dixo, a final internacional, á que accederán os equipos que gañen as competicións a escala nacional, celebrarase este ano en Doha, Catar, os días 6 e 8 de novembro.
Todos os nenos e nenas que concursen na WRO recibirán un premio en recoñecemento á súa participación e esforzo. O premio para os equipos gañadores de cada unha das 3 categorías consistirá nun cheque regalo por un importe de 1.500 € que se outorgará aos centros escolares correspondentes e que se destinará a axudar aos devanditos centros a sufragar os gastos para a participación dos seus alumnos na fase nacional o vindeiro 11 de outubro no centro Cosmocaixa en Barcelona. Para formalizar as inscricións, os centros escolares poderán dirixirse á páxina da WRO.