Facebook elimina a sincronización con numerosos servizos e aplicacións de Microsoft

En numerosas ocasións vemos como cambios unilaterais no acceso á API dun servizo en liña causa prexuízos a desenvolvedores e usuarios, pero a actualización da Graph API de Facebook está a converterse nun dos cambios máis drásticos dos últimos tempos, xa que elimina completamente a característica coñecida como Facebook Connect, que facilitaba que as aplicacións de contactos e calendario de Microsoft en Outlook.com, Windows, Windows Phone e outros servizos deixen de poder tomar a información de contacto dos nosos amigos de Facebook á vez que impide que a galería fotográfica, Movie Maker ou OneDrive.com poidan compartir contidos en Facebook.
Deste xeito, os contactos de Facebook xa non se engadirán a Outlook.com, os eventos de Facebook xa non aparecerán automaticamente no calendario de Office 365, Contactos de Windows 8/8.1 non poderán ver a actividade dos usuarios de Facebook, o Calendario de Windows 8/8.1 non recibirá as datas de aniversario dos contactos de Facebook, a aplicación de Contactos de Windows Phone 7/8 deixará de sincronizarse… e definitiva, que Facebook pecha a billa a funcionalidades moi prácticas para os usuarios de sistemas operativos de Microsoft (que son maioría en Facebook), aínda que cómpre destacar que a información importada de Facebook ata o momento continuará a estar dispoñible, de xeito que estamos ante un atranco que afectará principalmente a longo prazo.