As posibilidades de negocio cultural na mediación tecnolóxica, ao detalle nunha xornada do CCG

José Teixeira, profesor de política cultura da Universidade de São Paulo, estará este martes na sede do Consello da Cultura Galega, en Santiago, para falar do mercado, e da industria cultural e dos seus retos nunha sociedade do coñecemento plenamente inserida nas plataformas 2.0 e no emprego estendido dos dispositivos móbiles. Teixeira, lembra o CCG, chega a Compostela para afondar, entre outras cousas, na súa afirmación de que “os smartphones son o segundo cerebro dos habitantes do século 21”. O relatorio do profesor brasileiro insírese na xornada que pecha o ciclo Desafíos do ecosistema cultural galega ante a Axenda Europea 2020.
Teixeira tamén centrará a súa intervención en analizar o papel crecente que a cultura está a desempeñar no sistema económico e no que cómpre diferenciar o consumo cultural do uso da cultura. Nese sentido, apunta á mediación tecnolóxica, os smartphones, que na súa opinión están a experimentar arestora un moi salientable espallamento que cómpre atender de perto e de certo aproveitar. A súa intervención titúlase Desafíos da cultura no ecosistema comunicativo do século XXI.
O ciclo no que se insire este relatorio conta en labores de coordinación con Xosé López e oriéntase a amosar a relevancia e o papel que desenvolve a cultura nas estratexias europeas.
Na última xeira de traballo participan tamén Paz Castro da editorial Kalandraka, Emma Lustres da produtora Vaca Films e Asunta Rodríguez da Galeria Trinta, que contarán as súas experiencias prácticas sobre o mercado e a industria. Esta sesión está coordinada pola catedrática Margarita Ledo.