Stephen Elop deixa Microsoft

Esta tarde Microsoft sorprende anunciando importantes cambios nos postos directivos da compañía que tradúcense nunha reestruturación da mesma, no que pode verse como o paso final tras a absorción de Nokia, completándose a operación soltando lastre, ou sexa, desprendéndose de figuras tan representativas como Stephen Elop (principal artífice o achegamento de Nokia a Microsoft), Kirill Tatarinov, Eric Rudder e Jo Harlow (anterior directiva de Nokia que tamén abandona agora Microsoft, aínda que a compañía de Redmond non a cite no seu comunicado oficial).
Aínda que o abandono de Microsoft por parte de importantes directivos de Nokia era algo previsible tras o período de transición propio da absorción doutra empresa, non estamos ante un simple cambio de caras, pois agora fórmase un novo equipo dirixido polo vice presidente executivo Terry Myerson, o Grupo de Dispositivos e Windows (WDG), que fusiona os equipos de dispositivos e o de sistemas operativos, encamiñando a estrutura corporativa para cumprir cos obxectivos marcados por Satya Nadella, director xeral de Microsoft que asegura que “estamos a aliñar as nosas capacidades e esforzos en enxeñaría para cumprir coa nosa estratexia e, en particular, as nosas tres ambicións esenciais” (reinventar os procesos de negocio e produtividade, construír unha plataforma intelixente na nube e crear unha informática máis persoal), ao que engade que “este cambio permitiranos achegar mellores produtos e servizos que amen os nosos clientes a un ritmo máis rápido”.