Até 21 empresas apostaron en 2014 polo viveiro virtual da Cámara de Santiago

A Cámara de Comercio de Santiago de Compostela vén de presentar a súa memoría de actividades referente a 2014, accesible xa nun documento específico en formato PDF. No informe, en liñas xerais, recóllense as accións e servizos achegados pola entidade en beneficio das case 4.000 empresas de Santiago e contorna e Barbanza. O presidente da Cámara, Jesús Asorey, foi o encargado de dar a coñecer os detalles do informe, salientando a gran cantidade (e calidade) dos servizos fornecidos para impulsar a creación de empresas e formar ás xa existentes en novos usos, procedementos e vieiros de actividade. Neste senso, as novas tecnoloxías foron un piar fundamental da traxectoria levada a cabo pola Cámara en 2014.
Boa parte desta vertente tecnolóxica e innovadora materializouse a través do viveiro de empresas do polígono de Costa Vella, que en palabras de Asorey “representa o espírito emprendedor e a capacidade de impulso da creación de empresas que ten a Cámara de Comercio de Santiago”. Así, en 2014 asentáronse nas súas instalacións 15 firmas físicas e 21 decidíronse polo viveiro virtual. A taxa de supervivencia empresarial desta estrutura situouse nun 80 por cento. Ademais, a Cámara puxo en marcha un curso e charlas divulgativas en centros de ensino dos concellos da súa demarcación, e visitas guiadas ás instalacións do viveiro co fin de atopar futuros emprendedores. Realizáronse 23 accións de fomento do espírito emprendedor que contaron coa participación de 736 alumnos.
Xa a un nivel xeral e centrándonos no apartado de formación, a Cámara de Comercio programou durante 2014 un total de 124 accións formativas que contaron coa asistencia de 2.596 alumnos. Informática e novas tecnoloxías, comercio internacional, comercio e distribución, contabilidade e fiscalidade, habilidades sociais, idiomas, financiamento e proxectos europeos, recursos humanos e emprendemento foron as áreas clave de divulgación. Ademais dos cursos propios, leváronse a cabo outras actividades formativas como xornadas ou seminarios, realizados en colaboración con outros organismos e institucións. Segundo explicou o presidente da entidade, “o último ano cubríronse o cento por cen das prazas na formación gratuíta o que confirma o interese polas temáticas presentadas”.
Na área de innovación, transferencia e pulo empresarial, o programa Feira do Coñecemento axudou a que 89 empresas estableceran contacto con centros tecnolóxicos de nivel, asistindo a tres xornadas de sensibilización, para finalmente acadar 24 preacordos de colaboración. No programa de balde InnoCámaras, deseñado pola Cámara de Comercio de España, a entidade compostelá quixo potenciar a presenza da innovación e fortalecer a posición competitiva das pequenas e medianas empresas. En 2014 foron admitidas 51 firmas da demarcación. Con respecto ao programa TIC Cámaras, o pasado ano 29 empresas beneficiáronse da posibilidade de incorporar tecnoloxías da información como ferramentas competitivas “claves na súa estratexia”, informou Asorey, que tamén lembrou que o ano pasado intensificouse aínda máis a comunicación en liña da entidade compostelá, no camiño de espallar e reforzar as súas actividades e servizos pola Rede. Así, ademais da traxectoria consolidada pola súa propia páxina web, a Cámara creou perfís sociais en Facebook e Twitter. A web cameral recibiu en 2014 30.536 visitas, cunha media mensual de 4.886 de visitantes diferentes.