Os Angry Birds estarán moi presentes na Coruña durante o mes de setembro

Os paxaros anoxados de Rovio levan un tempo demostrando que teñen moita vida fóra das pantallas dos nosos móbiles, conseguindo facer moito máis negocio no mundo da mercadotecnia que a través do lecer electrónico, e para sumarse a esta febre o centro comercial e de ocio Espacio Coruña vai organizar unha serie de actividades de acceso libre e de balde durante as tres primeiras fins de semana de setembro ao redor das figuras dos Angry Birds.
O centro comercial coruñés contará cun grande espazo tematizado cos personaxes e decorados de Angry Birds no que se desenvolverán distintas actividades para toda a familia, como unha zona National Geographic (para descubrir a natureza a través dos libros oficiais de National Geographic Angry Birds), zona cookies (para que os pequenos decoren as súas propias galletas), zona de puntería (recreando o xogo dos Angry Birds no mundo real), zona handicraft (na que realizar manualidades), zona de clay buddies (na que modelar con pasta) e, como non podía ser doutro xeito, unha zona interactiva na que poder xogar aos videoxogos dos Angry Birds.
Adicionalmente, e para animar o espazo, un dos paxaros máis carismáticos do xogo, Red, estará presente para facerse fotografías cos visitantes que o desexen.
Estas actividades desenvolveranse os venres e sábados entre o 4 e o 19 de setembro conforme aos horarios que figuran na páxina web de Espacio Coruña.