A semana que vén Santiago será o epicentro galego e estatal do emprendemento feminino de alicerce tecnolóxico. De feito, a través do programa Woman Emprende da USC, Compostela acollerá o Encontro Atalanta adicado á creación de empresas innovadoras promovidas por mulleres. Atalanta é unha proposta que organizan conxuntamente o día 21 na Facultade de Ciencias Económicas e Empresariais a USC e o Instituto da Mulleres e para a Igualdade de Oportunidades á que están convidadas as universidades estatais e máis polo miúdo os organismos que participan na creación de firmas de raizame TIC e baseadas no coñecemento innovador.
Segundo informa a USC, no transcurso da xornada presentarase a metodoloxía Innovatia 8.3, proxecto de traballo desenvolvido dentro de Woman Emprende que fornece recursos e consellos para facilitar o proceso emprendedor “dun xeito neutral en termos de xénero”.
Na xuntanza realizarase tamén unha análise das particularidades do emprendemento feminino universitario da man de representantes de institucións universitarias de Madrid, Cataluña, Andalucía ou Euskadi. Ademais está programada unha mesa de debate con algunhas das mulleres que lideran empresas spin-off promovidas dende diferentes universidades españolas para propiciar o intercambio de experiencias de éxito neste eido.
O Encontro Atalanta converterá Santiago nun foro do emprendemento tecnolóxico feminino
Compartir Este Artigo
