Desenvolvedores e usuarios xúntanse en Colaboratic.gal para cambiar o mundo con software libre

Hoxe estase a celebrar na Cidade da Cultura unha xornada demostrativa e participativa para amosar aos nosos profesionais o múltiple e variado potencial da programación aberta (programación para implantar na nosa empresa, para crearmos novo software, para impulsar proxectos, para acadar apoios). Falamos da xornada Colaboratic.gal, organizada pola Asociación de Empresas Galegas de Software Libre (AGASOL) e a Axencia para a Modernización Tecnolóxica de Galicia (AMTEGA) co duplo obxectivo de amosar (pola mañá) e colaborar (pola tarde). O evento foi inaugurado ao fío das 9.30 horas polos principais responsables de AGASOL e AMTEGA, Xavier Castaño e Mar Pereira, respectivamente. Coincidiron na necesidade de seguir divulgando as vantaxes do código aberto para universalizalo aínda máis entre as nosas microPEME e PEME.
Durante a súa intervención, Mar Pereira lembrou que “o fomento do uso do software libre e, en particular no sector empresarial, continúa a ser unha aposta da estratexia dixital do Goberno galego”. Segundo fixo saber, con estas actuación concretas, abeiradas ao Plan anual de Software Libre, “incrementouse de xeito notable o emprego dos recursos libres na nosa terra”. A proba disto, sinalou, está nos máis recentes resultados dos informes do Observatorio da Sociedade da Información e a Modernización de Galicia (OSIMGA), nos que figura que oito de cada dez empresas de Galicia con 10 ou máis empregados empregan software libre. Isto, engadiu Mar Pereira, sitúa a Galicia por riba doutras comunidades como Madrid, Cataluña ou Euskadi.
A directora de AMTEGA tamén recordou, seguindo o fío destes informes de OSIMGA, que nas microempresas mantense tamén “a tendencia crecente”, chegándose na actualidade a unha taxa do 52,1% no que se refire a uso de recursos informáticos abertos nas microPEME.
Pereira tamén fixo un percorrido polos principais atrancos no camiño dun espallamento aínda máis universal do open source nas firmas galegas máis pequenas: “A principal barreira para á implantación do software libre nas microempresas é o descoñecemento de solucións e a falta de referencias sobre produtos libres”. Nas empresas de 10 e máis traballadores, pola contra, “o principal obstáculo son as dúbidas sobre as problemáticas que poderían desencadearse coa migración a software libre”.
Logo da inauguración a xornada foi dando acubillo á presentación de diversos proxectos de código aberto e/ou traballo colaborativo para, en palabras dos seus responsables, “mellorar o mundo a través do software sen cancelas”. Houbo relatorios sobre casos de éxito en materia de comunicacións e relacións provedor-cliente (Alfresco e Queres, Aena e Librebit, Deloga e Innoto) e houbo achegamentos á vertente máis solidaria e social da programación aberta, exemplificado neste caso por Cidadanía e pola firma Tagen Ata, unha cooperativa galega moi centrada en desenvolver accións formativas avanzadas para toda a sociedade (software libre complementando con formación sen atrancos, aberta e accesible no económico e no tecnolóxico).

Tamén se deu a coñecer a iniciativa Neukos Robotics, da man de Marcos Alonso, e máis o seu proxecto Eiro, unha proposta que mestura software e hardware libre cun importante ingrediente formativo e que se materializa nun robot educativo do mesmo nome, “vestido á galega”, que ten campaña específica de crowdfunding en Goteo e que busca botar abaixo boa parte dos atrancos e limitacións establecidas polos fabricantes tradicionais deste tipo de aparellos, atrancos e limitacións propios da tecnoloxía privativa. Eiro, segundo se nos lembrou hoxe, é un kit de robótica didáctica para darmos forma a un robot programado con software libre e baseado na plataforma aberta Arduino.

Outra das liñas de traballo presentadas en Colaboratic.gal foi, precisamente, a liña de traballo da plataforma Goteo. Esta foi debullada por Mercè Moreno, coordinadora do nodo Goteo Barcelona e asesora de campañas na dita plataforma de micromecenado en liña. Segundo recordou, trátase dun servizo para favorecer e dinamizar o crowdfunding que conta, respecto de servizos análogos, cunha vantaxe fundamental, que é a de “achegar máis e mellor comunicación cos responsables dos proxectos acubillados e impulsados”, antes, durante e despois da consecución dos financiamentos solicitados. Mercè tamén falou de casos de éxito (moitos) e de casos de incumprimento de proxectos (poucos) que soen ser, estes últimos, iniciativas con financiamento acadado que finalmente non se emprega para o previamente anunciado e estipulado. Este tipo de casos, sinalou, adoitan solucionarse con acordos dos responsables das iniciativas e coa devolución do recadado.
Na xornada tamén interviñeron, incidindo nas moitas vantaxes de facer colaboración arredor do desenvolvemento tecnolóxico e do código aberto, Luis Alberto Fernández, xerente de AGASOL, Micho García, impulsor de Xeoinquedos, e Alberto Permuy, membro do Colectivo Drupal.