A HBO competirá con Netflix en España

O vídeo baixo demanda a través da Internet parece imparable, e agora que en España podemos gozar de Netflix, a plataforma deste tipo máis popular a nivel mundial, parece que a competencia vai afiar as súas armas, xa que hoxe anuncian que HBO prepara a comercialización de HBO NOW no noso territorio, de xeito que poderemos contratar o acceso aos contidos da plataforma de Time Warner sen ter contratada a canle dentro dunha oferta de televisión de pagamento convencional.
Parece que a HBO aprendeu dos erros cometidos por Netflix no seu desembarco español, país no que consideran que hai unha grande presenza da banda larga e da piratería, e para conseguir que a súa nova proposta conte con atractivo, reterán os dereitos das súas series, evitando o que acontece coas últimas tempadas de House of Cards e Orange is the New Black (que pese a ser series orixinais de Netflix, en España só están dispoñibles a través de Movistar+).
Tendo en conta que a grande carencia da meirande parte das plataformas de pagamento de vídeo á carta é a serie Game of Thrones, o novo escenario resulta moi interesante, xa que permitirá comprobar se o público que masivamente descarga semanalmente a serie de máis éxito dos últimos anos estará disposta a pagar por acceder legalmente á mesma.
A chegada de HBO NOW a España está prevista para finais de ano, tería un prezo semellante ao de Netflix, e incluiría contidos de HBO, Showtime, Starz e AMC Networks, así como películas, de xeito que englobaría un catálogo moi atractivo.