A Mega Drive mini sairá á venda en setembro

A febre das consolas de videoxogos mini parece terlle funcionado ben polo momento só a Nintendo, e máquinas como The C64 Mini e a PlayStation Classic tiveron unha recepción moi mala, polo que sorprende que finalmente, tras o anuncio de adiamento realizado o pasado setembro, SEGA ouse pór data de lanzamento para a súa Mega Drive mini, consola de tamaño reducido que veremos nas tendas o vindeiro 19 de setembro incluíndo 40 xogos precargados.
Esta nova consola terá un prezo de 79,99 euros incluíndo un par de mandos e os cables USB e HDMI precisos para xogar, e confirman que entre os seus xogos integrados estarán Sonic the Hedgehog, Ecco the Dolphin, Castlevania: Bloodlines, Space Harrier 2, Shining Force, Dr. Robotnik’s Mean Bean Machine, ToeJam & Earl, Comix Zone, Altered Beast e Gunstar Heroes, títulos considerados clásicos que, na súa meirande parte están incluídos na SEGA Genesis Classics Collection.