A UVigo lidera un proxecto para achar lixo litoral con drons e procesado de imaxes

xoves, 9 de febreiro do 2017 Redacción

A Universidade de Vigo concorre con tres propostas de proxectos na convocatoria Blue Labs: innovative solutions for maritime challenges, unha iniciativa europea que distingue as achegas científico-tecnolóxicas que contribúan ao medre do que se coñece como Blue Growth, o crecemento azul, unha estratexia a prol do sustentábel para os sectores vencellados ao mar, que ao abeiro desta estratexia son considerados prioritarios para a economía da UE. Os tres proxectos con participación viguesa, que forman parte dunha listaxe de só catro iniciativas “finalistas”, abranguen cuestións como o uso de tecnoloxías de vehículos aéreos non tripulados (UAV ou drons) e recursos de procesado de imaxes para achar lixo en praias ou zonas litorais; a integración e posta en marcha dun laboratorio para desenvolver para desenvolver solucións eficaces contra a contaminación mariña; e máis a identificación de compostos de interese para a industria farmacéutica e alimentaria nas macroalgas invasoras. Os proxectos seleccionados recibirán financiamento do Fondo Europeo Marítimo e de Pesca (FEAMP). A convocatoria ten un orzamento de 1,7 millóns.
Fernando Martín, Ana Bernabeu e Celia Olabarría son os encargados de coordinar a participación viguesa en cada un dos tres proxectos: LitterDrone, SpilLess e Amalia, respectivamente. Polo que atinxe ao primeiro, LittleDrone, é o único liderado pola Universidade de Vigo (o resto están “participados”). Concorren nel dous grupos da institución educativa viguesa xunto coa Asociación Española de Basura Marina e Grafinta SL, unha empresa de material topográfico, incluíndo UAV. O obxectivo do proxecto, cun orzamento total de 392.657 euros e dous anos de duración, “é aplicar tecnoloxías actuais, como a obtención de imaxes dende drons e procesado dixital das mesmas, para axudar ao control e limpeza do lixo nas costas”, explica o profesor Fernando Martín. Por parte da institución viguesa participan o Grupo de Procesado de Imaxe e Realidade Virtual e o Grupo I-markt. O primeiro deles, con sede na EE Telecomunicación, encargarase de deseñar un software capaz de identificar obxectos estraños como lixo nas imaxes procedentes dos vehículos aéreos. O resultado, sinala Martín, “debería ser unha ou varias ferramentas software que permitan detectar os diferentes tipos de refugallos: plásticos, hidrocarburos, etc”. O grupo I-markt, da Facultade de Ciencias Económicas e Empresariais, avaliará os posíbeis servizos e modelos de negocio que poden xurdir para explotar a tecnoloxía desenvolvida no proxecto, incluíndo a creación de novas empresas.
Pola súa banda, o proxecto SpilLess (First line response to oil spills based on native microorganisms cooperation) está impulsado por un consorcio de centros de investigación e empresas de Portugal (Centro Interdisciplinar de Investigação Marinha e Ambiental da Universidade de Porto, que coordina o proxecto; Instituto de Engenharia de Sistemas e Computadores, Tecnologia e Ciência e a empresa Biotrand), Galicia (Grupo Geoma da Universidade de Vigo e a axencia marítima local ACSM) e Noruega (a empresa Marlo). Cun orzamento de 370.000 euros e dous anos de duración, a finalidade é implementar un laboratorio para desenvolver solucións viábeis na xestión da contaminación mariña, especialmente nos caos de mareas negras. Estas solucións materializaranse de dúas maneiras: a través da produción de consorcios microbianos nativos con capacidade de biorremediación, e tamén, coa adaptación de vehículos non tripulados e autónomos para combater in situ un evento de contaminación, liberando de forma localizada estes microorganismos (bioaumentación) ou nutrientes (bioestimulación).
Por último, o proxecto Amalia focaliza o seu labor no estudo das algas mariñas invasoras. Nel participan varias institucións de Portugal (Instituto Politécnico de Leiria, que actúa de coordinador; o Instituto de Ciencia de Inovaçao em Engenharia Mecanica e Engenharia Industrial; a Universidade de Coimbra; a Associaçao para o Desenvolvimento de Peniche e empresa Algalplus Lda); Galicia (Universidade de Vigo); Austria (Biomin Holding GmbH) e Holanda (Quest Photonic Devices BV). Con dous anos de duración e un orzamento total de 614.462 euros, esta iniciativa xorde como dixemos para identificar nas algas invasoras compostos ou moléculas con potencial interese para a industria farmacéutica o alimentaria.

PUBLICIDADE