A Xustiza estadounidense quere que Chrome deixe de ser de Google

O Departamento de Xustiza dos EE.UU. e unha coalición de 38 fiscais xerais estatais seguen buscando unha orde xudicial que obrigue Google a vender o seu navegador Chrome e a tomar outras medidas para abordar o que un xuíz cualificou como un monopolio ilegal da busca, segundo documentos presentados en Washington.
Un voceiro de Google asegurou a Reuters que «as propostas seguen indo moito máis aló da decisión do Tribunal e prexudicarían os consumidores, a economía e a seguridade nacional dos Estados Unidos».
O que non recolle o novo texto xudicial son mencións á participación de Alphabet en Anthropic (un dos competidores máis directos de OpenAI), pois aínda que inicialmente aseguraban que os investimentos en IA poderían supor un abuso de posición dominante, agora consideran que un desinvestimento en Anthropic suporía unha vantaxe para OpenAI e Microsoft, danando claramente a competencia.
Alphabet presentou a súa propia proposta, que inclúe flexibilizar os acordos con Apple e outras compañías para que Google deixe de ser o motor de busca predeterminado en novos dispositivos, estando previsto que teñan unha audiencia ante o xuíz federal Amit Mehta no mes de abril.