A Zona Franca explora en Barcelona novas formas de colaboración para o futuro Hub Audiovisual de Vigo

A Zona Franca de Vigo comezou o ano dando novos pasos no proceso de creación do Hub Audiovisual, iniciativa que o Consorcio lidera coa participación do sector da Eurorrexión Galicia-Portugal e que busca ser un referente en todo o noroeste peninsular e a propia Eurorrexión. Neste marco de traballo, unha delegación da Zona Franca e do Concello de Vigo visitou en Barcelona o Hub XRLab Palo Alto, centro estratéxico do sector audiovisual en Cataluña e un dos seus principais polos económicos.
Este equipamento, dotado de laboratorios e coworkings e impulsado polo Concello da cidade e unha alianza empresarial, é en palabras da Zona Franca “un foco sobresaliente de innovación e coñecemento en contidos dixitais de última xeración, que se crean a través do emprendemento e do talento”. Baséase nun modelo de xestión e colaboración pública-privada que é tamén unha das premisas básicas do Consorcio, ferramenta que emprega en todos os seus proxectos estratéxicos.
O delegado do Estado, David Regades, confirmou que desde Zona Franca “seguimos buscando todo o coñecemento sobre as necesidades do gran centro de produción audiovisual que queremos para Vigo, ideado como punto de encontro, innovación e produción para a industria audiovisual da Eurorrexión, e coa vocación de ser un polo que aglutine a empresas, iniciativas e profesionais. Por iso, encontros como os que mantivemos en Barcelona son clave para enriquecer o noso proxecto e acertar co que necesitamos porque son referentes no sector”.
O delegado lembrou que a intención do Consorcio neste proceso é “impulsar o crecemento e a competitividade do sector audiovisual, acompañar á nova actividade económica, captar investimento nacional e internacional, e atraer e xerar talento e emprego de calidade”.
Pola súa banda, Carmela Silva, primeira tenente de alcalde do Concello de Vigo, destacou que “Vigo é un lugar idóneo para unha aposta tan ambiciosa polo audiovisual porque partimos dunha enorme capacidade tecnolóxica de coñecemento e tamén dunha traxectoria moi relevante vinculada a este sector”. Silva puxo en valor “que esta aposta de Zona Franca vai permitir que, ademais de que a cidade xa sexa referente en sectores industriais como no automóbil, como en todo o que ten que ver co sector da fotónica ou os sectores tradicionais, Vigo constitúa ademais un polo de talento, innovación e creación audiovisual”.
En relación coa Consulta Preliminar ao Mercado (CPM) que o Consorcio vigués lanzou no mes de novembro para testar o interese de posibles operadores do sector audiovisual para a xestión do futuro HUB Audiovisual de Vigo, David Regades confirmou que unha vez pechado o prazo, o pasado día 23, ata sete operadoras presentáronse á consulta coas súas respectivas propostas. O delegado do Estado sinalou que “a análise das formulacións destas operadoras sobre necesidades técnicas e operativas de fronte ao deseño final do inmoble e a súa futura explotación será agora tido en conta para a futura licitación do proxecto”.