Adobe ultima a súa aplicación de debuxo para o iPad

No mes de xuño anunciouse unha aplicación de debuxo desenvolvida baixo o proxecto Gemini que finalmente levará por nome Adobe Fresco e que busca que usuarios de iPad e outros dispositivos táctiles e con lapis dixitalizador poidan gozar dunha experiencia de debuxo e pintura moi próxima á do uso de materiais tradicionais, trasladando así ao dixital a sensación orgánica de utilizar papel, lapis, acuarelas, xiz e diferentes tipos de pintura.
Adobe Fresco é unha aplicación orientada a artistas, ilustradores, animadores, bosquexadores ou calquera que queira debuxar ou pintar, que distánciase do Photoshop aproveitando a súa tecnoloxía (permite o uso dos pinceis de Photoshop), pero centrándose no uso de acuarelas, óleos e outros materiais de debuxo para conseguir lenzos moi semellantes aos reais, conseguindo incluso certo efecto tridimensional da pintura.
Esta ferramenta busca que o proceso de ilustración poida realizarse dun xeito moito máis áxil, facilitando o illamento de partes, permitindo o uso de máscaras e incluso con vantaxes como permitir a configuración da interface en función da man coa que queiramos debuxar e podendo amosar o lenzo a pantalla completa para evitar distraccións.
Fresco é compatible cos formatos gráficos habituais de Adobe, e está previsto que chegue a finais de ano á App Store para o seu uso nos iPad con soporte de Apple Pencil, para contar máis adiante con versións, aínda que tamén está previsto que máis adiante chegue a dispositivos Surface e a Wacom Mobile Studio Pro (aínda que sen prazos previstos para tal lanzamento). Para poder gozar desta ferramenta será preciso contar cunha subscrición a Creative Cloud.