As empresas galegas Aeromedia, Cerna, Balidea e Greenalia revolucionan con XESTAL a xestión de recursos forestais

Na mañá deste 25 de marzo presentouse no Centro Experimental Áncora (Cervo-Lugo), xestionado polo Instituto Tecnolóxico de Galicia (ITG), un proxecto tecnolóxico a catro mans destinado a revolucionar a xestión dos recursos forestais. Trátase de XESTAL (Xestión Forestal Sostible Mediante Teledetección Remota), impulsado por un consorcio formado polas empresas Aeromedia, Cerna, Balidea e Greenalia, e que conta coa colaboración da Universidade de Santiago (USC), o Instituto Tecnolóxico de Galicia (ITG) e a Xunta de Galicia. Botando man de tecnoloxías avanzadas de detección mediante drons, XESTAL marcará un antes de un despois no control e explotación dos nosos bosques.
A cita de hoxe incluíu entre outras cousas unha demostración na que un UAV (Vehículo Aéreo non Tripulado) realizou medicións de masa forestal que permiten calcular de forma áxil a altura das árbores, o seu diámetro, especie ou volume de madeira, parámetros todos eles que en moitos casos séguense recollendo a man, explicaron as empresas integrantes do consorcio, engadindo que XESTAL engadirá importantes extras de produtividade e eficacia ás empresas forestais e, tamén, ás administracións públicas, xa que lles permitirá garantir a autonomía, a eficacia e a sustentabilidade dos traballos ao tempo que reducen o custe de todas as operacións. “O proxecto está concibido para a optimización de procesos crave na xestión de recursos forestais, como as actuacións que implican os plans de ordenación forestal (podas, adecuación de pistas, etc.)”, apuntaron as empresas, ao tempo que puxeron o foco no valor que pon en xogo para dar soporte a procesos de sistemas de certificación forestal, como o FSC ou o PEFC.
Empresas e tecnoloxías gañadoras
O consorcio de entidades que desenvolveu esta iniciativa que integra tecnoloxía e I+D, formado polas empresas galegas Aeromedia, Cerna, Balidea e Greenalia, ademais da Universidade de Santiago de Compostela (USC) e o Instituto Tecnolóxico de Galicia (ITG), e que contou coa colaboración da Xunta de Galicia, combinou o desenvolvemento dun sistema SIX (Sistema de Información Xeográfica) e dun dron de tipo VTOL (de á fixa con capacidade de despegue e aterraxe vertical). Desta forma, o Sistema de Información Xeográfica permite medir e inventariar as especies forestais máis presentes na industria, como o eucalipto ou o piñeiro, reunindo nun único lugar as diferentes fontes de datos usadas, como poden ser o propio dron ou a información proporcionada polos satélites e outra cartografía basee.
Pola súa banda, o vehículo aéreo posibilita mellorar os rendementos de traballo actuais na toma de datos remotos na contorna forestal. “Ao utilizar este UAV-VTOL as mostraxes pódense realizar a baixa altura, polo que a precisión das imaxes é moito maior, e, ademais, o custo e tempo de preparación dun voo non tripulado son moi inferiores ao dun tripulado”, explicaron as empresas.
Desde Aeromedia destacan que “levouse a cabo unha inxente tarefa de mostraxe de masas de eucalipto e piñeiro a fin de dispor de suficientes datos de parcelas que permitisen definir un modelo de inventario robusto; ao longo de todo o proxecto medíronse preto de 200 parcelas cun sensor LIDAR embarcado nun dron. Estas parcelas de mostraxe repártense por uns 60 montes ao longo de 47 parroquias de Galicia, especialmente en Lugo e A Coruña”. Aeromedia asegura que “con XESTAL conseguiuse minimizar o traballo de campo de medición manual ao ser suplementado cos datos tomados desde drons e logrouse dispor dunha ferramenta SIX que optimiza as tarefas de xestión e ordenación forestal”.
A presentación de Xestal contou coa presenza da directora da Axencia Galega de Innovación (GAIN), Patricia Argerey, que destacou a contribución deste proxecto á modernización dos sectores primarios galegos, en concreto a xestión dos recursos forestais, un dos retos prioritarios da Estratexia de Especialización Intelixente (RIS3) de Galicia, e a súa aposta polas tecnoloxías baseadas en vehículos non tripulados, en liña coa iniciativa da Xunta de Galicia para crear un Polo Aeroespacial en Galicia.
Este proxecto de I+D+i aprobouse na convocatoria Conecta Peme 2018 da Xunta de Galicia a través de GAIN. O desenvolvemento levouse a cabo desde mediados de 2018 até decembro de 2020.