As portabilidades de telefonía móbil poderán facerse nun día dende xuño de 2012

A Comisión do Mercado das Telecomunicacións (CMT), en cumprimento coa Directiva 2009/136/CE, aprobou os procedementos para que os operadores de telefonía móbil poidan facer posible a portabilidade de liñas no prazo dun día laborable.
Ata o momento o habitual era agardar ata 4 días laborables para poder ter o móbil operativo con outra compañía conservando o número, pero a partir de xuño de 2012 os prazos para facer efectiva a portabilidade comezarán a contar dende o momento no que acádese un acordo co novo operador para mudar de compañía (e non cando o noso operador rexistra a solicitude).
Co novo procedemento, se un usuario solicita a portabilidade un luns (pola mañá ou pola tarde) terá garantido o cambio de compañía o mércores ás 6:00 horas, reducíndose considerablemente o tempo no que pode cancelarse o cambio de compañía (antes das 14:00 horas do día anterior a que o cambio sexa efectivo) e coa novidade de que xa non poderá cancelarse a portabilidade dende o operador donante (teremos que contactar coa compañía receptora da nosa liña).
Actualmente xa é posible portar de número móbil en 1 día en países como Alemaña e Reino Unido, polo que a Directiva mencionada o que busca é harmonizar este tipo de procedemento considerado como un dereito dos clientes de telefonía móbil que o ano pasado rexistrou en España 4,8 millóns de cambios.
Dende a CMT tamén aseguran estar a procurar un procedemento semellante en axilidade para as portabilidades de telefonía fixa.