Astro Bot gaña o premio ao Xogo do Ano

venres, 13 de decembro do 2024 Marcus Fernández

A pasada noite fíxose entrega dos The Game Awards, os premios de referencia do sector dos videoxogos, nos que resultou como principal gañador o título Astro Bot de Team Asobi, converténdose no décimo gañador deste recoñecemento. O director do estudio, Nicolas Doucet, recolleu o premio entregado por Swen Vincke, de Larian Studios, gañador na edición anterior. Durante o discurso, Doucet agradeceu ao resto do equipo o seu traballo e paixón. O xogo impúxose a outros favoritos, incluído Black Myth: Wukong, así como Metaphor: ReFantazio, Balatro, Final Fantasy VII Rebirth e Elden Ring: Shadow of the Erdtree.
Astro Bot tamén levou varios outros premios durante a noite, incluídos Mellor Dirección de Xogo, Xogo Familiar e Xogo de Acción/Aventura. Outros candidatos ao Xogo do Ano tamén acadaron galardóns. Balatro levou os premios ao Mellor Xogo Independente, Mellor Debut de Xogo Independente e Mellor Xogo para Móbiles. Metaphor: ReFantazio foi recoñecido como Mellor RPG e Mellor Dirección de Arte, mentres que Final Fantasy VII Rebirth fíxose co recoñecemento á Mellor Banda Sonora e Música.