Bahía impulsa unha innovadora tecnoloxía smart para coidar dos nosos bosques: uForest
xoves, 6 de abril do 2017
Bahía
Software, compañía galega do ámbito TIC, está a liderar o
desenvolvemento dun proxecto tecnolóxico directamente encamiñado a
protexer os nosos bosques. Trátase
da plataforma uForest, unha tecnoloxía que tira proveito de
drons e software específico para, en palabras de Bahía, salvagardar
o futuro das nosas forestas. Segundo informan os responsábeis da
empresa galega, “é unha tecnoloxía moi innovadora, xa que integra
todo o proceso preciso e axeitado para a toma de decisións no ámbito
forestal”. Este proceso consiste na captura de información a
través de vehículos aéreos non tripulados (UAV polas súas siglas
en inglés) de información xeorreferenciada sobre masas arbóreas, a
súa visualización e a súa análise.
Na
actualidade, explican dende Bahía, a medición das fragas e o
seguimento da evolución das mesmas teñen dous tipos de
dificultades: os altos custos económicos e a súa loxística. Porén,
sinalan, uForest pon en xogo drons desenvolvidos en exclusiva para
esta plataforma, permitindo unha “redución de custos de maneira
significativa respecto dos medios convencionais como avións,
helicópteros ou satélites”.
Estes
vehículos aéreos non tripulados teñen o cometido de recoller
datos, permitindo compilar información que, unha vez tratada e
interpretada, pódese usar para o apoio de toma de decisións nos
ámbitos forestal, ambiental e agrícola.
A
tecnoloxía uForest comezarase a probar en tres destes usos: o
modelado de combustíbel e prevención de incendios, o estado
fitosanitario da vexetación dun bosque e o proceso de cartografar e
clasificar hábitats. “A nosa tecnoloxía”, explican os
enxeñeiros de Bahía, “aplica o concepto de Smart City ao
ámbito forestal e ambiental, unificando o acceso á información e
posibilitando a creación de aplicacións de valor engadido dunha
maneira sinxela, estandarizada e con capacidade de evolucionar e
adaptarse a diferentes contornas”.
A
plataforma uForest introduce polo tanto unha manchea de elementos
diferenciais que, no seu conxunto, permiten pór no mercado unha
ferramenta pioneira e innovadora que cobre as necesidades de
obtención e xestión de datos ambientais de forma rápida, precisa,
eficaz e cun custo eficiente. Entre eles atópase a utilización de
drons como “instrumento clave que permite unha redución de custos
de maneira significativa respecto dos medios convencionais como
avións, helicópteros ou satélites”, explica a firma galega,
engadindo que os UAV parten, neste senso, “coas vantaxe da
axilidade e inmediatez na adquisición de datos cunha alta
resolución”.
Segundo
lembran os enxeñeiros de Bahía a respecto de todo o devandito e da
importancia dos drons, os expertos coinciden en que os vehículos
aéreos non tripulados “non substituirán ás antigas ferramentas
de medición”, pero si que serán quen de “constituírense como
un sistema máis a disposición dos técnicos, a unir ás inspeccións
a pé sobre o terreo ou aos voos tripulados e ás imaxes por
satélite”. De feito, a combinación dos diferentes tipos de datos
capturados desde o ar grazas ao uso de UAV fornece a posibilidade de
obter resultados “antes non alcanzábeis”, explican dende a
empresa galega.
Respecto
da contorna de usuario deseñado por Banía Software permite
traballar de maneira “amigábel” con toda a información da que
se dispón, “posibilitando a análise sistemática dos datos e a
aplicación de técnicas de simulación para diferentes escenarios”.
E engaden fontes da empresa: “Grazas a esta ferramenta interactiva
de visualización, o usuario poderá interactuar de maneira áxil con
información LiDAR, de cámaras multiespectrais e térmicas; imaxes
de cámaras de alta definición; e sistemas de información
xeográfica”. Ademais o deseño de uForest está concibido non só
para as necesidades actuais senón tamén para responder os retos do
futuro da xestión forestal, ambiental e agrícola.