Beatriz Salvador, investigadora do CITIC, obtén unha bolsa posdoutoral ERCIM en Ámsterdam
luns, 4 de marzo do 2019
A
investigadora
do CITIC Beatriz Salvador Mancho incorporouse a primeiros de febreiro
a unha estancia posdoutoral no Centro de Investigación de
Matemáticas e Informática (CWI) de Ámsterdam, referente
europeo e mundial no seu ámbito de traballo. A incorporación
materializouse logo de obter Beatriz unha bolsa posdoutoral na
competitiva convocatoria de ERCIM. A investigadora presentou a súa
candidatura a estas bolsas pouco tempo antes de defender a súa tese
o 17 de decembro de 2018 na Facultade de Informática da UDC, en
parte avalada polas publicacións asociadas á súa tese.
Beatriz
Salvador realizou a súa tese baixo a dirección dos profesores e
membros do CITIC, Íñigo Arregui Álvarez e Carlos Vázquez Cendón,
dentro do programa de doutoramento de Métodos Matemáticos e
Simulación Numérica en Enxeñaría e Ciencias Aplicadas. A temática
da tese enmárcase no modelado, análise matemática e simulación
numérica dos axustes de valoración derivados da consideración do
risco de contrapartida en certos contratos financeiros. Durante a súa
etapa predoutoral, Beatriz Salvador estivo financiada cun contrato
FPI, que lle permitiu realizar estancias na Comenius University of
Bratislava para traballar co profesor Daniel Sevcovic, obtendo varios
artigos en colaboración.
A
concesión da bolsa e a estadía posdoutoral supón unha oportunidade
para desenvolver novos temas de investigación no ámbito das
finanzas computacionais no CWI durante un ano, prorrogábel por un
segundo ano.