ChatGPT estrea axente para os usuarios de pagamento

OpenAI vén de presentar o axente de ChatGPT, unha ferramenta capaz de xestionar tarefas complexas de principio a fin de forma autónoma. Este novo sistema combina capacidades avanzadas de razonamento, interacción coa web e execución de accións nun único modelo que, ademais de comprender as ordes do usuario, é quen de poñelas en práctica con autonomía e seguridade.
Desde hoxe, esta nova funcionalidade está dispoñible para os usuarios dos plans Pro, Plus e Team, e chegará tamén aos plans Enterprise e Education antes de rematar o mes de xullo. Os usuarios Pro contarán con tarefas case ilimitadas ao mes, mentres que os restantes terán un máximo inicial de 50, con opcións de ampliación mediante créditos.
A principal novidade radica na súa capacidade para alternar entre pensamento e acción. Isto permítelle realizar desde investigacións financeiras ata a creación de presentacións ou completar formularios, sen necesidade de que o usuario interveña en cada paso. ChatGPT é quen de navegar por sitios web, aplicar filtros, escribir ou executar código segundo as necesidades da tarefa.
Este axente é o resultado da integración de dous avances anteriores: Operator (un navegador remoto que interactuaba coa web) e a ferramenta de investigación profunda baseada en razonamento. Ao combinar ambos enfoques, o novo axente permite realizar accións máis útiles e contextualizadas, como analizar competidores, xerar informes automáticos ou organizar reunións segundo a dispoñibilidade do usuario.
Un dos puntos fortes deste sistema é a súa capacidade para escoller automaticamente a ferramenta máis axeitada en cada paso, combinando un navegador visual, outro textual e acceso a API. Todo isto ten lugar nun contorno virtual illado e seguro, no que se respecta a privacidade e o control do usuario.
O axente require sempre a confirmación do usuario para executar accións sensibles, como enviar formularios ou acceder a información persoal. Ademais, introduce modos de observación obrigatorios en tarefas críticas e rexeita accións de alto risco como transaccións financeiras ou interaccións legais.
A nivel de rendemento, os resultados tamén avalan a súa utilidade: o axente de ChatGPT superou marcas anteriores en probas como Humanity’s Last Exam, SpreadsheetBench e WebArena, chegando a duplicar a eficacia de modelos previos como GPT‑4o ou Copilot en tarefas de análise de datos ou edición de follas de cálculo.