ChromeOS Flex xa está dispoñible oficialmente

Tras a compra de Neverware, a empresa desenvolvedora de CloudReady, Google anunciou que estaban a preparar ChromeOS Flex, unha versión de ChromeOS preparada para ordenadores ordinarios que non tivesen tal sistema operativo preinstalado como acontece cos Chromebook e os Chromebase, e agora confirman que Chrome OS Flex xa está preparado para chegar a unha ampla gama de ordenadores PC e Mac.
Xa podemos probar Chrome OS Flex directamente, gozando así no noso equipo dun sistema operativo baseado na nube, rápido, doado de xestionar e seguro, que podemos correr directamente dende unha unidade USB, de xeito que non é preciso instalalo para comprobar se resulta axeitado para os nosos equipos e escenarios de uso e, de ser frutíferas as probas, podemos substituír o noso sistema operativo actual por ChromeOS Flex.
Cómpre salientar que ChromeOS Flex non é un ChromeOS completo, senón que ten limitacións como a falta de soporte de aplicacións para Android ou a imposibilidade de correr máquinas virtuais, así como numerosas prestacións que están directamente ligadas ao hardware dos equipos, pero para moitos usuarios iso non é un problema, e poder gozar dun equipo libre de malware pode ser motivo dabondo para apostar por esta solución.
No caso das empresas as vantaxes de empregar ChromeOS Flex está basicamente na posibilidade de aproveitar equipos actuais para gozar dun sistema seguro e doado de xestionar a través da nube.