Cisco, Eviden, Inforhouse, R e Vodafone recibirán o Premio 15 Aniversario CPEIG

O Colexio Profesional de Enxeñaría en Informática de Galicia (CPEIG) vai distinguir co Premio 15 Aniversario CPEIG ás empresas tecnolóxicas Cisco, Eviden, Inforhouse, R e Vodafone polo “seu constante apoio e colaboración na Noite da Enxeñaría en Informática, tendo o papel de patrocinadores durante practicamente o xurdimento da Noite garantindo a súa celebración durante estes quince anos”. Os premios serán entregados, precisamente, no marco do dito evento, o 16 de xuño no Hotel OCA Puerta del Camino de Santiago. Directivos de cada unha das compañías tecnolóxicas recollerán a distinción no acto de entrega dos galardóns.
Digitaliza, de Cisco
Segundo destacan fontes do CPEIG, Cisco é líder mundial en tecnoloxía para Internet e inspira novas posibilidades “reinventando as aplicacións corporativas, protexendo ás organizacións, transformando a súa infraestrutura e facilitando o traballo colaborativo para avanzar cara un futuro global e inclusivo”. Recollerá a distinción o director Public Sector Spain de Cisco, Xavi Massa.
A través do seu programa Digitaliza, Cisco España contribúe a acelerar a transformación tecnolóxica de empresas, administracións, sectores verticais, pemes e startups; a formar a mozos, desempregados e profesionais en tecnoloxías de ultima xeración; e a innovar xunto aos seus partners para impactar positivamente na sociedade. Ampliado ata 2024, Digitaliza xa logrou grandes fitos na transformación dixital de empresas, universidades, hospitais, escolas ou xulgados.
Como un dos motores de Digitaliza, o Centro de Innovación de Cisco en Barcelona combina a colaboración entre Cisco, as administracións e a industria impulsando proxectos dixitais que melloren a calidade de vida dos cidadáns, cren empregos e optimicen a competitividade económica.
Unha nova scale-up dixital, Eviden
Eviden é a nova marca coa que o grupo Atos identifica parte do seu actual negocio, que, cuns ingresos de aproximadamente 5.000 millóns de euros, converterase en compañía independente no segundo semestre de 2023. Trátase dunha nova scale-up dixital, con sede en Santiago de Compostela, entre outras localizacións, onde “se unen as capacidades máis brillantes e punteiras para expandir de maneira sustentábel as posibilidades ao redor do dato e da tecnoloxía”, destaca o CPEIG, poñendo o foco na misión principal de Eviden: ser o socio dixital, de cloud, de datos e de seguridade preferido polos clientes, para axudalos de forma diferencial a construír o seu futuro dixital e sustentábel. Eviden centra os seus obxectivos no liderado de seis pancas clave para os negocios: a aceleración da súa transformación, as plataformas intelixentes como facilitadoras, a nube, a computación avanzada, a seguridade dixital e a sustentabilidade, sendo a única empresa de TI que presenta estas capacidades de maneira integral. Recollerá o galardón na Noite o director Rexional de Eviden, Gabriel Torre.
Inforhouse, máis de 30 anos ao servizo do sector TI
A compañía Inforhouse ten máis de 30 años de experiencia no sector TI. Fundada en 1988, experimentou un crecemento sostido ao longo destes anos ata chegar a ser unha das primeiras empresas deste sector en Galicia e con 100% de capital galego.
A compañía ofrece solucións tecnolóxicas de valor para axudar na dixitalización dos procesos das organizacións para lograr que sexan máis eficientes. Conta cun equipo humano de 100 persoas en continua actualización de coñecementos para ser o provedor tecnolóxico de referencia. Algúns dos seus proxectos relevantes son o subministro e implantación de equipamento no Centro de Proceso de Datos da Axencia para a Modernización Tecnolóxica de Galicia, no Servicio Galego de Saúde, CESGA, CIXTEC, Concello de Vigo, Universidade da Coruña, Faurecia Automotive, FRINSA, Santos Equipamiento de Interiores, Indalsu, CTAG e DS Smith; subministro e implantación de plataforma de impresión e 19.000 monitores en centros de atención primaria e dependentes do Servizo Galego de Saúde; tamén ofrece servizo de mantemento informático en diferentes organismos (como a Axencia para a Modernización Tecnolóxica de Galicia, o Servicio Galego de Saúde e o Consorcio Galego de Servizos de Igualdade e Benestar), soporte de solucións de xestión empresarial a diversas compañías de diversos sectores e actividade, e soporte de software e de solucións de seguridade. Recollerá a distinción no evento da Noite o director Xeral de Inforhouse, Vidal Díaz Cotón.
R, 25 anos de telecomunicacións para Galicia
O CPEIG salienta que a operadora R, dende o inicio da súa andaina, hai xa case 25 anos, “ten traballado coa teima de ser a operadora de telecomunicacións de Galicia, a empresa cos servizos máis innovadores e de vangarda que puidese dixitalizar todos os fogares e negocios galegos para competir ao máximo nivel en calquera lugar ou mercado do mundo”.
O tempo, explica o colexio, “demostrou que aquela meta a prol de Galicia non era unha quimera”; e dende hai anos R é a firma de telecomunicacións líder da comunidade que ofrece servizos de internet, telefonía fixa, telefonía móbil 4G e 5G, banda larga e televisión dixital; e, para empresas, solucións IoT (Internet das cousas), tecnoloxía de Cidades Intelixentes e Industria 4.0. Como marca recoñecida con forte implicación local e líder en fibra óptica e servizos converxentes de telecomunicacións é “a opción preferida nos fogares e empresas de Galicia onde ten despregada a súa rede de fibra óptica”, lembra o CPEIG, recordando tamén que en agosto de 2021 integrouse no Grupo Masmovil e converteuse na súa insignia en Galicia. A integración impulsou os resultados de R, sobre todo polas súas afinidades nos valores esenciais de orientación ao cliente, axilidade, proximidade ou sostibilidade (B-Corp, Zero Neutral Carbon, ISO 14001 y 50001, Sustanaible Fitch, recoñecemento CDP...). Entre eses logros figuran, ademais, superar a cifra de 1,3 millóns de fogares cubertos coa fibra óptica máis avanzada do mercado, acadar outros 300.000 con solucións sen fíos 5G para dispoñer de alta velocidade aí onde a fibra non pode chegar (internet rural); ou que o 85% da poboación de Galicia teña xa dispoñibilidade de acceso a servizos avanzados con esa tecnoloxía de quinta xeración (5G).
“Quedan por diante aínda moitos retos para R, porque os desafíos das novas tecnoloxías, da Intelixencia Artificial, a analítica de datos, a contorna 4.0 e infinidade de ferramentas de vangarda están en constante desenvolvemento”, engade o CPEIG, apuntando que a folla de ruta de R fala dun operador galego que t”en percorrido abondo para lles seguir ofrecendo a todos/as os/as galegos e galegas a máxima calidade de servizo e innovación, combinadas coa proximidade ás persoas e ás empresas que dende sempre definiu a esencia da empresa no territorio”.
Esta distinción outorgada polo CPEIG será recollida na gala da Noite polo director de R, Alfredo Ramos.
Vodafone quere rematar ano con 5G total en 138 municipios de Galicia
Vodafone é a maior empresa de telecomunicacións paneuropea e africana. O seu propósito é conectar por un futuro mellor utilizando a tecnoloxía para mellorar a vida, dixitalizando sectores críticos e facendo posíbeis sociedades dixitais inclusivas e sustentábeis. A compañía proporciona servizos móbiles e fixos a máis de 300 millóns de clientes en 17 países, e ten acordos con redes móbiles en 46 países máis. Vodafone é líder mundial en Internet das Cousas (IoT), conectando máis de 160 millóns de dispositivos e plataformas. Con Vodacom Financial Services e M-Pesa conta coa maior plataforma de tecnoloxía financeira de África, que presta servizo a máis de 56 millóns de persoas en seis países.
Tamén se comprometeu a reducir o seu impacto medioambiental para alcanzar cero emisións netas en 2040, ao tempo que axuda aos clientes a reducir as súas propias emisións de carbono en 350 millóns de toneladas para 2030. Está impulsando ademais accións para reducir os residuos de dispositivos e alcanzar o seu obxectivo de reutilizar, revender ou reciclar o 100% dos residuos dos seus equipos de rede.
No que respecta a Galicia, o director Territorial de Vodafone Norte, Francisco Vallejo, que recollerá a distinción en A Noite, indica que se trata “dun territorio de grande importancia para Vodafone e un dos territorios nos que a súa cota de mercado sempre destacou”. De feito, Galicia estivo presente desde o primeiro momento no plan de investimento e de despregadura do 5G. Xa en 2019 comezouse a comercializar a rede 5G para os clientes de Vodafone en Galicia e o obxectivo da operadora é finalizar 2023 con presenza total en 138 municipios.
Desta forma, máis de 2,2 millóns de galegos poderanse beneficiar dunha mellor cobertura especialmente en interiores de edificios e gran dispoñibilidade de largo de banda e de transmisión de datos, tamén en contornas rurais e pequenas localidades, xa que dos 138 municipios case o 65% conta con menos de 10.000 habitantes.