Classora achega as clasificacións deportivas aos móbiles

A base de coñecemento Classora leva uns meses intentando espallar os seus contidos máis aló da súa páxina web, e tras estrear aplicación para Facebook (Classora Social Rankings) agora dan o salto a dispositivos móbiles con Classora Sports, que permite a consulta de clasificacións presentes e pasadas de distintos deportes dende o inicio da competición, así como trazar a evolución de equipos e deportistas ao longo da historia.
Entre os datos accesibles para esta aplicación están as principais ligas europeas, así como as ligas de 1ª A, 2ª, 2ª B e 3ª A de España (fútbol), clasificacións de pilotos e construtores en Fórmula 1, campionatos de MotoGP, Moto2 e 125cc en motocilismo, clasificacións da NBA e ACB en baloncesto, clasificación da ATP (tenis), o Tour de Francia, o Giro de Italia e a Volta a España (ciclismo), rallies, olimpíadas e máis.
A aplicación está dispoñible tanto en español como en inglés, e pode descargarse para dispositivos Android 1.6 ou superior ou para terminais con iOS 3.0 ou posterior (como o iPhone ou o iPod Touch). Ambas versións son de balde e no caso de Android (que leva varias semanas dispoñible) superou as 500 instalacións, o que supón un volume de descargas máis que considerable para un desenvolvemento galego.