Comeza o Campamento Tecnolóxico de Verán no Campus Industrial de Ferrol

A vicerreitora do Campus de Ferrol e Responsabilidade Social, Ana Ares, e o director do Campus Industrial de Ferrol, Marcos Míguez, recibiron esta mañá aos 33 rapaces e rapazas, de entre 6 e 16 anos, que están a participar, ata o venres 26 de xuño, na primeira quenda do Campamento Tecnolóxico de Verán Aventura STEM: Viaxe no Tempo.
Trátase dunha actividade organizada por terceiro ano consecutivo por Play Code Academy en colaboración co Campus Industrial de Ferrol.
A segunda quenda desta proposta lúdico-formativa celebrarase do luns 29 de xuño ao venres 3 de xullo, de 9:00 a 14:00 horas.
A Facultade de Humanidades e Documentación e o Edificio de Apoio ao Estudo serán os espazos nos que a rapazada aprenderá a programar drons para mapear xacementos arqueolóxicos, construirá robots pintores para axudar a artistas moi coñecidos e coñecidas nos nosos días e desenvolverá sistemas de alerta para protexer os nosos refuxios prehistóricos.
Os rapaces e rapazas participantes reforzarán as súas habilidades en programación, robótica e ciencia traballando con ferramentas como a robótica con LEGO, Arduino, drons, Micro:Bit; Edison, Delightex ou mesmo co deseño e a impresión 3D.