Disney+ prohibe compartir conta

xoves, 28 de setembro do 2023 Marcus Fernández

No mes de agosto Disney+ anunciou a súa intención de mudar as súas tarifas, producíndose a súa renovación o vindeiro 1 de novembro, cando o servizo pasará de ter un único plan de subscrición a 3 plans diferentes: estándar con anuncios, estándar e premium.
O plan actual, que custa 8,99 euros/mes ou 89,99 euros/anos tería como equivalente o plan premium, cun prezo de 11,99 euros/mes ou 119,9 euros/ano, polo que enténdese que a compañía está a aplicar unha das subas de prezo máis esaxeradas nun servizo deste tipo, o que podería agochar unha clara intención: dirixir aos subscritores ao plan estándar con anuncios, que ten un prezo de 5,99 euros/mes, que curiosamente era o prezo de lanzamento de Disney+ en España en 2020.
Este cambio parece claramente inspirado en Netflix, e non só se limitará aos plans de subscrición, senón tamén ás medidas para compartir contas, e cómpre advertir de que, mentres os medios están a advertir de que en novembro Disney+ comezará a aplicar medidas contra as contas compartidas en Canadá, realmente as medidas mencionadas tamén se aplicarían a España, pois no contrato de subscrición actual xa figura a limitación de uso do servizo a contas dunha única residencia persoal principal.
O contrato do servizo especifica o uso compartido de contas no seu apartado 1.c detallando que «non poderá compartir a súa subscrición fóra do seu fogar. Fogar significa a colección de dispositivos asociados á súa residencia persoal principal, na medida en que sexan utilizados por persoas que residan na mesma», deixando a porta aberta a que algúns plans de subscrición poidan relaxar tal condición (como acontece en Netflix coa posibilidade de pagar un extra para poder agregar contas secundarias).
Queda agora por ver que tipo de solución adoptará Disney+ para limitar o uso compartido de contas, pois tanto poden facer un seguimento dos enderezos IP empregados como pode limitar o número de dispositivos asociados á conta. En poucas semanas sairemos de dúbidas, aínda que tamén é posible que non se adopten medidas moi drásticas, como está a acontecer con Netflix.

PUBLICIDADE