Educación, AMTEGA e Concellos incrementarán o subministro educativo de equipamentos e conectividade
martes, 28 de abril do 2020
Entidades
tecnolóxicas e sociais da nosa terra (por
exemplo o colectivo da Enxeñaría Técnica en Telecomunicación)
levan tempo advertíndoo: a pandemia agrava a fenda dixital que
separa ás familias conectadas das que non o están. O motivo? A
obrigatoriedade de proseguir os estudos coa fórmula da
teleformación, que deixa fóra ás familias sen cobertura ou sen
recursos para dotarse dela. Co obxectivo de combater a fenda, o
Goberno galego e unha manchea de concellos iniciaron hai semanas
medidas urxentes para subministrar equipamentos e conectividade ás
nenas e nenos en risco. Agora, as administracións xuntan forzas para
ampliar a medida, fortalecela e buscar que ninguén quede fóra da
teledocencia.
A
Xunta de Galicia (a través da Consellería de Educación e a axencia
AMTEGA), a FEGAMP e os concellos de Galicia que o consideren,
establecerán unha liña de cooperación para a mellora da
conectividade e a dotación de recursos tecnolóxicos ao alumnado
do ensino non universitario.
No
acordo establécese que, por razóns de competencia, o Goberno galego
atenderá con prioridade ao alumnado de ESO, Bacharelato e FP, de
acordo cos criterios de promoción e titulación. Pola súa banda, os
concellos interesados en colaborar no préstamo e reparto de
equipamento e conectividade de propiedade municipal daranlle
prioridade ao alumnado das etapas de Infantil e Primaria.
A
maiores, Educación e AMTEGA traballarán coa Federación Galega de
Municipios e Provincias (FEGAMP) nun protocolo para a creación
“dunha base de datos de equipamentos única con destino ao alumnado
non universitario, que identifique os beneficiarios e evite eventuais
solapamentos nas entregas do material”. Ao abeiro deste protocolo,
os equipamentos locais circunscribiranse sobre todo a atender as
demandas nas etapas de Infantil e Primaria, mentres que a Xunta de
Galicia lle dará prioridade a ESO, Bacharelato e FP.
Finalmente,
no que atinxe á recollida ou distribución de material non
informático, estableceuse que os centros educativos poderán
solicitar, se fose preciso, a colaboración dos servizos de
Protección Civil ou da Policía Local, para efectuar ditas entregas.
2.270
kits até o de agora
A
día de hoxe a Xunta de Galicia está a poñer a disposición das
familias 2.750 kits informáticos compostos por portátiles e
conexión gratuíta a Internet destinados ás familias con menos
recursos que teñen escolarizados aos seus fillos en centros
públicos, co “fin de garantir o seguimento da actividade educativa
a todos aqueles alumnos que non dispoñen de posibilidades de
conexión”.