Enric Trillas, un dos grandes expertos estatais en intelixencia artificial, estará o 19 no CiTIUS
mércores, 10 de febreiro do 2016
O salón de actos do CiTIUS (Universidade de
Santiago) vai acoller o 19 de febreiro un encontro con Enric Trillas,
catedrático de Ciencias da Computación e Intelixencia Artificial da
Universidade Politécnica de Madrid. Será o Seminario
Lóxica e linguaxes,
previsto para as 11.30 horas no centro tecnolóxico compostelán. O
CiTIUS lembra que Enric Trillas (Barcelona, 1940) foi pioneiro
en España na “lóxica difusa ou borrosa” (en inglés fuzzy
logic), amais de ser un dos primeiros investigadores adicados a
este ámbito da ciencia no contexto europeo. Segundo engade o centro,
este eido da investigación céntrase en boa medida en acadar que as
máquinas poidan reproducir o noso xeito de pensar e razoar.
Recordar tamén que Trillas foi presidente do
Consello Superior de Investigacións Científicas (CSIC), director
xeral e vicepresidente do Instituto Nacional de Técnica Aeroespacial
(INTA), secretario xeral do Plan Nacional de Investigación
Científica e Tecnolóxica e secretario da Comisión Interministerial
de Ciencia e Tecnoloxía e presidente da compañía Ingeniería y
Servicios Aeroespaciales (INSA). Ao longo da súa andaina
investigadora xerou máis de dous centos de publicacións e artigos
científicos e tecnolóxicos e foi recoñecido con algúns dos
premios máis relevantes no ámbito da lóxica difusa. Ademais, foi
distinguido coa Orde ao Mérito da República Italiana, categoría de
Grande Uffiziale, a Gran Cruz do Mérito Aeronáutico e a Medalla
Narcís Monturiol ao mérito científico e tecnolóxico. Desde 1990 é
catedrático de Ciencias da Computación e Intelixencia Artificial da
Facultade de Informática da Universidade Politécnica de Madrid, así
como investigador emérito do European Centre for Soft Computing de
Mieres (Asturias) e Doutor Honoris Causa da Universidade Pública de
Navarra.