Facebook estrea aplicación para países con conexións móbiles precarias

Cada vez son máis os usuarios que ten Facebook a nivel mundial, especialmente dende dispositivos móbiles, pero non sempre os usuarios contan con smartphones potentes e conexións móbiles de banda larga, senón que teñen que enfrontarse aos atrancos que supón acceder á Rede a través de lentas redes 2G, o que levou ao lanzamento dun novo cliente para Android desta plataforma social: Facebook Lite.
Esta nova aplicación persegue empregar un menor consumo de datos, para o que fai un uso máis eficiente das conexións, axilizando as cargas. E para reducir os recursos que consume esta ferramenta tamén contiveron o seu tamaño en menos de 1 Mbyte, o que axiliza enormemente a súa instalación.
Facebook Lite permite intercambiar mensaxes con amigos, participar en conversas de grupo, recibir notificacións cando os amigos gustan ou comentan algunha das nosas publicacións, ver as actualizacións dos amigos e compartir actualizacións e fotografías, ou sexa, un uso de Facebook moi básico e rudimentario, o que permite que poidamos facer uso desta plataforma cando a nosa experiencia de Internet móbil sexa bastante precaria. Esta ferramenta vai dirixida principalmente a países pouco desenvolvidos de Asia e África.