Facebook permitirá estrear en directo vídeos pregravados

mércores, 18 de abril do 2018 Marcus Fernández

Facebook continúa a promover o vídeo na súa plataforma, e unha das súas novas funcionalidades, aínda en probas, resultará de grande atractivo para os creadores de contidos, xa que consiste na posibilidade de retransmitir un vídeo pregravado coma se fose un vídeo en directo, permitindo así que a audiencia interactúe en vivo e de xeito simultáneo durante a súa estra.
Polo momento este formato de Premiere está en probas (entre un grupo pechado de creadores e editores), e será de grande utilidade para a estrea de tráilers cinematográficos ou incluso de programas que queiran replicar en Facebook Live a experiencia propia das emisións televisivas nas que todos os usuarios participan á vez do consumo audivisual e da conversa en tempo real na Rede, só que desta volta Facebook non se limita a ser a segunda pantalla, senón que tamén sería a primeira.
Actualmente hai moitas ferramentas que facilitan a retransmisión en directo de vídeo pregravados, pero o feito de que tal tarefa poida deixarse nas mans de Facebook simplificará enormemente o proceso e abrirao a moitos máis creadores.

PUBLICIDADE