Fernando Pérez, membro do prestixioso grupo internacional dos IEEE Fellow

Fernando Pérez, catedrático de Teoría do Sinal e das Comunicacións da UVigo, vén de entrar a formar parte do grupo dos IEEE Fellow, en palabras da institución educativa galega “unha distinción só reservada para os integrantes máis destacados do Institute of Electrical and Electronics Engineers”, o IEEE, por ser precisamente “a máis alta honra que pode acadar un membro deste instituto”. O recoñecemento é en boa medida un xeito de salientar as máis de dúas décadas de Pérez adicadas á investigación en telecomunicacións, máis polo miúdo nas áreas de comunicacións dixitais e seguridade multimedia.
O catedrático da UVigo, que tamén foi no seu día director xeral do Centro Tecnolóxico Gradiant, sinalou que o devandito recoñecemento “non é só á miña traxectoria como investigador, senón un respaldo a un xeito de facer as cousas e o mérito de todo un equipo de investigadores que traballan de xeito rigoroso e tenaz”.
Segundo informa a Universidade de Vigo, arestora hai 9.500 Fellows en todo o mundo. Uns 300 deles integran a promoción de 2016, na que ademais do catedrático da Universidade de Vigo, tamén figura Pablo Rodríguez, director de Investigación e Innovación e responsábel do Barcelona R&D lab de Telefónica Dixital.
O Institute of Electrical and Electronics Engineers, formado por máis de 420.000 membros de 160 países, é a asociación internacional de referencia para o desenvolvemento e estandarización en áreas técnicas e dela forman parte profesionais de novas tecnoloxías, como enxeñeiros eléctricos, en electrónica e computación, matemáticos aplicados, enxeñeiros en biomedicina, enxeñeiros de telecomunicación ou enxeñeiros en mecatrónica. O IEEE publica o 30% das revistas científicas nos campos da enxeñaría eléctrica e das TIC e desenvolveu máis de 900 estándares internacionais, incluído o Wi-Fi.