GaliciaDixital presenta a nova web sobre un dos grandes representantes da nosa cultura no exterior: Manuel Rodríguez López
xoves, 15 de abril do 2021
GaliciaDixital
vén de poñer en marcha a
nova web do proxecto Manuel Rodríguez López, na que, segundo
informa a histórica plataforma online, reflíctense a vida e
a obra do escritor de Paradela, fillo predilecto deste concello
lucense e “considerado o mellor poeta obreiro galego do século
XX”, amais de “grande animador das actividades galegas en
Cataluña”, onde escribiu boa parte da súa obra. Alí, salientan
dende GaliciaDixital, “converteuse no vencello perfecto entre
Galicia e os galegos emigrantes en Cataluña”.
Esta
nova web, explican dende GaliciaDixital, “supón unha profunda
transformación respecto á plataforma anterior, un cambio encamiñado
a adaptala ás novas tecnoloxías e ás tendencias actuais en deseño
web”. De aí que se apostase por darlle unha viraxe radical ao
deseño gráfico, agora plenamente adaptado a todo tipo de
dispositivos móbiles, e “cunha nova estrutura da información
almacenada, que pretende facer que a web sexa máis accesíbel”.
Como
dixemos, a páxina acabada de lanzar forma parte do proxecto Manuel
Rodríguez López, emprendido por GaliciaDixital e a familia do
escritor, coa colaboración do Colectivo Egeria e o apoio da Xunta de
Galicia (Secretaría Xeral de Política Lingüística), o Concello de
Paradela, a Deputación de Lugo e a Real Academia Galega.
O
proxecto compleméntase con diversas publicacións, como o libro
Manuel Rodríguez López, 25 anos despois, que recolle
traballos de 50 personaxes destacados da cultura galega sobre a
figura de Manolo Rodríguez, e cunha exposición itinerante que
percorreu nos últimos 8 anos máis de 20.000 quilómetros, pasando
por numerosas cidades e vilas galegas, do resto de España, e mesmo
de Portugal.
O
proxecto Manuel Rodríguez López
O
proxecto Manuel Rodríguez López, emigrante galego, poeta
obreiro, nado co obxectivo de dar a coñecer a figura do
senlleiro escritor de Paradela, celebrou en 2020 os seus oito anos de
andaina, un período de tempo que comezou coa súa presentación na
Casa da Cultura de Paradela, no Nadal de 2012. “Desde aquela, a
iniciativa xa deu unha chea de froitos, algúns deles proxectados
desde o primeiro momento, moitos outros sorpresas agradables que
fomos atopando polo camiño, grazas a multitude de amigos,
colaboradores e entidades que acolleron a exposición itinerante”,
explican dende GaliciaDixital, facendo un repaso polas complexidades
que a pandemia puxo no camiño, que fixo que a exposición itinerante
non se puidese trasladar a ningún dos lugares que estaban previstos.
Con todo, confirman, o proxecto segue adiante e chega a un dos seus
grandes fitos históricos coa presentación da devandita web.
Exposición
itinerante
A
exposición itinerante sobre a vida e obra de Manuel Rodríguez está
formada por 16 paneis informativos, que poden ademais ser vistos
integramente na web do proxecto. Desde que a mostra foi presentada en
Paradela hai case 8 anos (agosto 2013), xa percorreu practicamente
todas as cidades e vilas importantes de Galicia, así como os Centros
Galegos de Barcelona, León, Salamanca, Vitoria, Valladolid, Las
Palmas de Gran Canaria, Llodio, Sevilla, Pamplona ou Santander, as
Universidades de Cáceres, Granada e Bilbao, e a Casa de Galicia en
Madrid. En Portugal estivo no Centro Galego de Lisboa, na Biblioteca
Lúcio Craveiro da Silva en Braga, da man da Universidade do Minho, e
na Universidade de Faro. En total, 47 emprazamentos e máis de 20.000
quilómetros percorridos.