Ghost of Tsushima chega ás tendas presumindo dun 40 sobre 40 en Famitsu

venres, 17 de xullo do 2020 Marcus Fernández

O agardado xogo exclusivo para PS4 Ghost of Tsushima de Sucker Punch tiña previsto o seu lanzamento para o pasado 26 de xuño, pero o adiamento de The Last of Us Parte II ao 19 de xuño provocou un reaxuste no calendario de lanzamentos, de xeito que o título ambientado na illa de Tsushima a finais do século XIII non estivo dispoñible até hoxe mesmo.
Ghost of Tsushima colócanos no rol do guerreiro samurai Jin Sakai, un dos últimos superviventes do seu clan tras a invasión mongola liderada polo desapiadado e enxeñoso xeneral Khotun Khan. Teremos que facer o que sexa preciso para que Sakai protexa á súa xente e recupere o seu fogar, para o que deberá desprenderse das tradicións que o formaron como guerreiro para forxar un novo camiño como Pantasma e librar así unha guerra pouco convencional pola liberdade de Tsushima.
Os mongois son inimigos formidables aos que haberá que ir adaptando as habilidades de Jin e aprender novas tácticas para defender a illa e protexer á súa xente. Poderemos gozar dunha experiencia inmersiva de combate samurai corpo a corpo coa nosa katana, pero tamén dominar o arco para atacar a distancia e desenvolver tácticas de sixilo e engano para desorientar aos inimigos e tenderlles emboscadas con ataques sorpresa.
Estamos ante un xogo bastante ambicioso que, aínda que non sexa para un público moi amplo, está a recibir boas críticas, tendo a honra de formar parte do exclusivo grupo de xogos que recibiron unha puntuación perfecta na revista xaponesa Famitsu (mérito só acadado por 27 títulos), aínda que medios españois como Vandal e Meristation son máis realistas e outórganlle ao xogo un 8,5 sobre 10, o que é unha magnífica puntuación, aínda que resulta evidente que a poucas semanas do lanzamento de The Last of Us Parte II resultaría inverosímil darlle unha puntuación superior ao xogo de Sucker Punch cando está varios chanzos por debaixo en case todos os aspectos.

Tráiler de lanzamento de Ghost of Tsushima

PUBLICIDADE