The Last of Us Parte II chegará a PS4 o 19 de xuño
luns, 27 de abril do 2020
A primeiros de mes, en vista das dificultades para unha
distribución física de videoxogos a nivel mundial por mor da pandemia, Sony
decidiu anunciar
o adiamento indefinido do seu principal lanzamento de 2020, The Last of Us Parte II,
título que dende Naughty Dog aseguraban ter practicamente listo para ver a luz;
e agora, vendo que a distribución está en vías de estabilizarse, ousan pór data
de lanzamento para o agardado xogo que tiña que ver a luz o 29 de maio e que finalmente
sairá pouco tempo despois: o 19 de xuño.
Nos últimos días tamén apareceron pola Rede numerosas filtracións do xogo,
forzando a Naughty Dog a amosar publicamente a súa decepción e pregar a non
divulgación de contidos en vídeo que poidan estragar a experiencia a futuros
xogadores por desvelar elementos importantes antes do lanzamento do xogo.
Ghost of Tsushima
The Last of Us Parte II non é o único lanzamento
destes meses que padece axustes na súa data de saída, e Ghost of
Tsushima non chegará na data prevista e sairá o 17 de xullo, data moi
pouco habitual para un grande lanzamento, pero que enténdese que estamos nun
ano fóra do normal, no que unha data estival previsiblemente non será mala para
o lanzamento deste grande traballo de Sucker Punch Productions. Este título tería
que ver a luz o 26 de xuño, e o seu retraso podería atender máis a motivos
de axenda (para non competir con outro grande lanzamento exclusivo da mesma
plataforma) que a dificultades no seu desenvolvemento.
