Ineo fará avanzar a transformación dixital do sur de Galicia a través da súa Oficina Acelera PEME
luns, 20 de setembro do 2021
Ineo,
a asociación de empresas TIC de Galicia, foi seleccionada pola
entidade estatal Red.es para impulsar a transformación dixital das
empresas do Sur de Galicia a través dunha Oficina Acelera PEME
(OAP). Esta iniciativa deuse a coñecer nos seus detalles este luns
20 de setembro, nun acto no que tamén se presentaron as súas dúas
sedes físicas (en Vigo e en Ourense) ademais dunha plataforma que
fará as veces de oficina virtual aberta.
Segundo
se fixo saber, a OAP brindará apoio, asesoramento e actuacións de
soporte para a transformación dixital de empresas e persoas
autónomas ao longo dos próximos dous anos, até maio de 2022.
En
palabras de Luis Álvarez Sestelo, presidente de Ineo, “para a
asociación é un orgullo ter sido seleccionada por Red.es para
axudar ás empresas galegas a dixitalizárense, un labor na que
sentimos moi cómodos xa que levamos máis de 15 anos asesorando e
exercendo de interlocutores entre o sector TIC e o tecido empresarial
de Galicia, ofrecendo soporte a máis de 500 empresas desde a nosa
creación”. O presidente de Ineo tamén destacou o apoio brindando
para este novo horizonte transformador polas seguintes entidades: a
Confederación Empresarial de Ourense (CEO), a Confederación de
Empresarios de Pontevedra (CEP), a Asociación Galega de
Emprendedores (AGAEMP), a Asociación Empresarial de Profesionais e
Autónomos de Ourense (AEPA) e o Centro Tecnolóxico Gradiant, con
base de operacións en Vigo.
Na
presentación oficial da OAP na sede da CEP participaron o presidente
da patronal pontevedresa, Jorge Cebreiros, e a presidenta da CEO,
Marisol Nóvoa, ademais do propio Álvarez Sestelo, quen subliñou
“que malia o chimpo dado polas pequenas e medianas galegas, que
pasaron dun 5 a un 30% de nivel de dixitalización por mor da crise
do COVID-19, queda moito por facer nun ámbito, o da transformación,
que abrangue cambios nas persoas, as estratexias e os procesos,
ademais de supor a adaptación de determinadas ferramentas
informáticas”.
Marisol
Nóvoa, presidenta da CEO, puxo en valor a implicación nesta
iniciativa das dúas confederacións: “O proxecto que nos reúne
hoxe aquí pon de manifesto dúas máximas que sempre defendemos pero
que agora, tras a pandemia, refórzanse aínda máis e fanse tamén
máis necesarias: a colaboración institucional e a dixitalización
da empresa”. E engadiu: “Na CEO sempre promovemos a primeira e,
desde a expansión das contornas dixitais, fomentado a segunda. A
colaboración institucional e entre entidades de idéntica natureza e
obxectivos como as que participamos nesta Oficina Acelera PEME, é o
mellor escenario para desenvolver proxectos que, como o de hoxe,
cobran maior relevancia e significado canto maior sexa o seu
alcance”.
Pola
súa banda, Cebreiros remarcou que “o nivel de dixitalización
alcanzado queda de manifesto co feito de que o 43% da produción en
Galicia se vira afectada pola crise dos microchips,
semicondutores e compoñentes”. Subliñou a importancia deste
proxecto de transición dixital: “Desde a Confederación de
Empresarios de Pontevedra hai tempo que temos claro que o futuro será
dixital ou non será. Agora máis que nunca esta afirmación é unha
realidade debido á crise provocada pola pandemia e as súas
repercusións directas sobre o tecido empresarial. Ninguén dúbida
xa deste feito”, dixo, engadindo que “a OAP ofrece unha
oportunidade definitiva a aquelas empresas que teñan pendente a súa
dixitalización ou a iniciaron e desexen acentuala”.
Sensibilización
e servizos
A
oficina ten unha duración de 24 meses, tempo no que desenvolverá
dúas liñas de acción. Por unha banda, centrarase en funcións de
sensibilización sobre a transformación dixital e, pola outra,
ofrecerá asesoramento sobre as vantaxes e metodoloxías que axudan a
esta transición, redundando na mellora tanto da produtividade como
da competitividade. Así a OAP, ofertará diferentes vías de
asistencia encamiñadas a alcanzar estes obxectivos entre empresas
(especialmente pequenas e medianas), autónomos e emprendedores das
provincias de Ourense e Pontevedra.
Entre
os múltiples servizos que prestará a OAP destacan a elaboración de
diagnósticos dixitais, o asesoramento personalizado e
individualizado para a dixitalización, a orientación no eido das
subvencións e axudas das diferentes administracións e, tamén, o
acceso a diferentes provedores tecnolóxicos. Ademais, servirá de
altofalante de informacións de interese a través de boletíns e
organizará tanto obradoiros como distintas actividades orientadas a
fomentar a transformación dixital.