Inside the Lab contou coa participación de 100 persoas e acolleu 10 demostradores

luns, 3 de xullo do 2023 S. P.

O pasado venres 30 de xuño celebrouse no CiTIUS da USC a oitava edición do evento Inside the Lab, baixo o lema Infinitas posibilidades. Participaron empresas, sector público e organizacións en xeral, que puideron descubrir os desenvolvementos tecnolóxicos máis recentes no ámbito de actuación deste centro compostelán. En concreto, o evento contou con dez demostradores (oito tecnoloxías e dúas spin-off) en avanzado estado de madurez, listas para a súa transferencia á industria e á sociedade. Acudiron unhas 100 persoas. Entre elas atopábase a nova alcaldesa de Santiago, Goretti Sanmartín.
A nova edición foi, segundo fixeron saber fontes do CiTIUS, un novo éxito de divulgación tecnolóxica, tanto pola cantidade de investigadores mobilizados como polo alcance das iniciativas presentadas.
Entre as tecnoloxías intelixentes que puideron descubrise no Inside the Lab 2023 destacaron, entre outras, circuítos e sistemas para IA, algoritmos para o cálculo de roteiros de escape en incendios forestais ou diferentes técnicas de visión artificial para a análise da calidade de produtos alimentarios, así como os últimos resultados das firmas xurdidas do CiTIUS Situm e Inverbis.
O vicerreitor de Política Científica, Vicente Pérez Muñuzuri, e a alcaldesa de Santiago, Goretti Sanmartín, visitaron o Inside the Lab 2023 e puideron recibir as explicacións do director científico do centro, Senén Barro. Tamén visitou o Inside the Lab, Dulce María García Mella, secretaria xeral da USC.
Ademais, as persoas visitantes puideron coñecer tamén os primeiros resultados do Proxecto Nós, en palabras do CiTIUS “a iniciativa máis importante desenvolvida nunca na área das Tecnoloxías da Linguaxe para a lingua galega”. Neste eido, Inside the Lab 8 mostrou o funcionamento de tres ferramentas: un tradutor automático (o primeiro con tecnoloxía neuronal desenvolvido para o galego desde Galicia), un sistema de recoñecemento de voz e un sintetizador de voz (baseados tamén en Deep Learning ou aprendizaxe profunda).
Demostradores
1 Realidade virtual e minería de procesos para rehabilitación de pacientes
2 Marbling​Predictor: a cata dixital do xamón
3 Proxecto Nós: tecnoloxías lingüísticas de texto
4 Yes, we CAM!
5 Caracterización de vías con LiDAR aéreo
6 Detección e seguimento de obxectos en escenarios complexos
7 Proxecto Nós: tecnoloxías lingüísticas de voz
8 En que idioma escribes?
9 Situm (Situm Indoor Positioning)
10 InVerbis

PUBLICIDADE