Instagram proba a publicación de álbums

mércores, 1 de febreiro do 2017 Marcus Fernández

Dende Droid Life veñen de detectar que a última versión de proba da aplicación de Instagram para Android hai unha nova característica experimental que permite a carga de varias imaxes nunha única publicación, o que podería considerarse como o equivalente aos álbums doutras plataformas sociais, e que actualmente estaría dispoñible para anunciante e, de funcionar axeitadamente, espallarase a todos os usuarios en breve.
A nova prestación permitiría cargar de vez até 10 fotografías da nosa galería e aplicarlles filtros de xeito independente, para que as imaxes figuren logo compartidas nunha única publicación na que os usuarios poderán navegar deslizando as sucesivas fotografías compartidas e poder interactuar con cada unha de xeito independente.
Aínda que as funcionalidades incorporadas en Instagram nos últimos meses contaron con bastante boa aceptación, desta volta parece non gustar moito que a aplicación de moda estea a abarcar tanto, converténdose nunha plataforma demasiado xeral, en vez dunha ferramenta para un uso moi determinado (que foi como naceu).

PUBLICIDADE