Intel despedirá a preto de 75 mil traballadores

Intel iniciou unha nova etapa marcada por unha reestruturación profunda e un cambio de rumbo estratéxico tras os anuncios realizados polo seu conselleiro delegado, Lip-Bu Tan. No seu primeiro comunicado dirixido ao persoal desde que asumiu o cargo en marzo, Tan presentou as medidas adoptadas no segundo trimestre e debuxou as liñas mestras do novo Intel, que inclúen un forte axuste de persoal, unha revisión do seu modelo de negocio e unha redefinición da súa aposta pola intelixencia artificial.
O anuncio prodúcese tras presentar uns resultados trimestrais mellores do previsto, cun nivel de ingresos que superou a marxe alta das estimacións. Porén, Tan recoñeceu que o crecemento require «decisións duras pero necesarias», como a redución do cadro de persoal global nun 15 %, ata arredor de 75.000 empregados, e a simplificación das estruturas directivas, con eliminación de aproximadamente a metade dos niveis de mando intermedios.
En paralelo, Intel tamén confirmou que renuncia aos seus proxectos industriais en Alemaña e Polonia e que pechará parte das súas operacións de ensamblaxe en Costa Rica, consolidándoas nos seus centros de Vietnam e Malaisia. A compañía tamén atrasará o ritmo de construción da súa fábrica en Ohio, nos Estados Unidos, co obxectivo de axustar os investimentos á demanda real.
A nova estratexia de Tan articúlase en torno a tres piares: transformar Intel Foundry nun negocio financeiramente máis disciplinado, revitalizar o ecosistema x86 e redefinir o enfoque da compañía en intelixencia artificial.
En canto á súa actividade como fundición, Intel adoptará unha política de investimento baseada exclusivamente en compromisos comerciais firmes, abandonando o modelo anterior de expansión sen demanda asegurada. A tecnoloxía Intel 18A converterase no núcleo da súa produción, con especial atención ao nodo Intel 14A, deseñado en colaboración directa con clientes estratéxicos.
Na área de procesadores, o CEO comprometeuse a recuperar cota de mercado nos segmentos de consumo e servidores, impulsando produtos como Panther Lake e Granite Rapids. Intel tamén reintroducirá o sistema de simultaneous multi-threading (SMT) tras considerar que a súa retirada foi un erro estratéxico.
Por último, Tan anunciou un cambio radical na visión da compañía sobre a intelixencia artificial, pasando dun modelo centrado na formación de modelos a outro orientado á inferencia e aos axentes de IA.